Hêzê Deryayî yê Mihafizanê Şorişî (Pasdar), eşkerayîya Wezaretê Teberî yê Îranî ke derheqê akerdişê Neqebê Hurmuzî de red kerd û dîyar kerd ke heta ablukaya DYA’yî serê lîmananê Îranî ra nêro wedarnayene, Neqebê Hurmuzî do bi temamî girewte bimano.
Qeraro verên ame vurnayene
Hêzê Deryayî yê Pasdaran eşkerayîyêk newî weşana û dîyar kerd ke qerarê verê cû binê koordînasyonê rayedaranê Îranî de û vera bacî destûrê derbasbîyayîşê keştîyan dayene ame betalkerdene. Pasdaran dîyar kerd ke korîdoro ewle yê ke verê amebî dîyar kerdene zî mîyan de heme Neqebê Hurmuzî nika ra trafîkê deryayî rê ameyo girewtene.
Keştiyê ku qerarî binpay bikerê do bibê hedef
Eşkerayîya ke medyaya dewlete ya Îranî de ameye weşanayene de, hişyarîyêka huşke ameye dayene. Pasdaran eşkera kerd ke her keştîyêka hewl bido girewtişê Neqebî Hurmuzî binpay bikero do bibo hedefê hêzanê înan. Tehran dîyar keno ke dewamkerdişê dorpêçê deryayî yê Amerîka yê serê lîmanan û keştîyanê Îranî, sey binpaykerdişê adirbestê mabênê her di welatan yeno vînayene.
Krîzê mabênê dîplomasî û hêzanê çekdaran de
Na gama pasdaran nîşan dana ke mabênê Wezîrê Teberî Abbas Arakçi û fermandarîya artêşe de problemêko xorîn ê qerardayîşî est o. Arakçi verê cû bi raya Xî eşkera kerd ke Neqebê Hurmuzî akerde yo, la eşkerayîya peyêne yê Pasdaran nîşan dano ke babeta stratejîk de vateyo peyên destê dîplomatan de nîyo, destê hêzanê çekdaran de yo.
No qeraro newe yê girewtişê bi temamî yê Hurmuzî reyna vayîya petrolî û asayîşê deryayî yê dinya visto binê tehlukeyêke girdî.
