Spanya û Welatê Baskî ra 15 sendîkayan seba “heqê hêvî” û akerdişê rayîrê prosesê dîyalogî, veng da Konseya Ewropa.
Sekreterê Pêroyî yê CGT’yî Burgos Nestor Cerezo Morquillas, Confederacion Intersindical û Confederacion Intersindical Galega zî mîyan de, 15 sendîkayan deklarasyonêko hempar weşana û seba tewrbîyayîşê Rayberê Şarê Kurdî Abdullah Ocalanî yê prosesê aştî veng da Konseya Ewropa.
Eşkerayî de ame vatene ke Rojhelatê Mîyanênî seba şero ke Îran zî tede yo krîzêko newe reyde rî bi rî yo û ame vatene ke, Tirkîya o welat o ke rasterast nêkewto şerî. Ame dîyarkerdene ke eleqeya na rewşe bi nêzdîbîyayîşê hemverê Rayberê Şarê Kurdî Abdullah Ocalanî est a ke seba herême “dîyalog û pêameyîş” keno rojev.
Sendîkayan dîyar kerd ke vera hedîseyanê Sûrîye, Rayberê Şarê Kurdî Abdullah Ocalanî perspektîfo ke seba kêmkerdişê tensîyonî û rayraberdişê dayîşûgirewtişanê sîyasîyan pêşkêş kerdo. Ameyo vatene ke şertê zindanê Îmralîyî seba kaykerdişê rolêko aktîf benê asteng.
Eşkerayî de zîyaretê Komîsyonê Demokrasî, Wayûbiratî û Paştîdayîşê Neteweyî yê Meclîsî yo ke serra 2025î de Îmrali rê kerd, sey “gamêka muhîme” ameye pênasekerdene; labelê ameyo vatene ke şertanê zindanî de vurîyayîşêko şênber çin o. Reyna ameyo vîrardiş ke raporê komîsyonî yo ke sibata 2026î de ameyo weşanayene, îşaretê lazimtîya caardişê qeraranê Mehkemaya Heqanê Merdiman a Ewropa (DMME) û Mehkememaya Destûrê Bingehîn kerdo.
Eşkerayî bi nê hewayî dewam kerd: “Sibata 2026î de raporo peyên ê komîsyonî ame weşanayene. Rapor de ameyo dîyarkerdene ke ganî qerarê MHME û Mehkemaya Destûrê Bingehîn a Tirkîya (AYM) bêrê caardene û pêşnîyaz ameyo kerdene ke mekanîzmayê ke estê bêrê xurtkerdene. Labelê çarçewaya têkoşînê vera terorî hema zî yena şuxulnayîş û no çî vernîya dîyalogêko raşt û pêameyîşêko domdar de asteng o. Rapor dîyar keno ke hukmatê Tirkîya pêşnîyazê Komîteya Wezîran a Konseya Ewropa ya êlula vîyarte not kerdo, labelê seba caaardişê ci gamêka şênbere nêeşta.
Birêz Ocalanî qerardarîya xo ya seba vurnayîşê eşkerakerdişanê xo bi çalakîyanê şênberan mojnaya. Badê vengdayîşê ey, PKK’yî eşkera kerd ke stratejîyê têkoşînê çekdarî qedînayo û sey organîzasyonêk xo fesih kerdo. Na çarçewa de par 88 wayîranê Xelata Nobelî û bi seyan sazgeh û kesan dîyar kerd ke ê paştî danê cehdanê Birêz Ocalanî yê seba cuyêka pîya. Sergêra vengdayîşê 2025î de Birêz Ocalanî deklarasyonêko newe weşana û tede sozdarîya xo ya bi aştî û demokratîkbîyayîşê Komara Tirkîya reyna dîyar kerd.
Ma seba caardişê qerarê Ocalanî yê 2014î yê MHME û naskerdişê ‘heqê hêvî’ veng da Komîteya Wezîran a Konseya Ewropa. Seba ke wezîyetê huqûqî yê Birêz Ocalanî bêro erjnayene û o eşkeno tewrê pêvajoya aştî bibo, na game zaf muhîm a. Nê semedî ra ma wazenê ke Abdullah Ocalan bêro veradayene û bêastengî firsend bidîyo ci ke tewrê prosesê aştî bibo.”
Sendîkayanê ke beşdarê vengdayîşî bîyê:
- Nameyê Sekreterîya Têkilîyanê Mîyanneteweyî ya Konfederasyonê Kar ê Pêroyî yê Spanyayî (CGT Spanya) David Blanco
- Sekreterê Pêroyî yê CGT Burgos Nestor Cerezo Morquillas
- Yewîneya Têkilîyanê Mîyanneteweyî ya Confederacion Intersindical
- Confederación Intersindical Galega
- Rêxistina Sendîkaya Karkeran a Aragonî (OSTA)
- Sendîkaya Piştgirîye ya Karkeran (Solidaridad Obrera)
- Sekreterê Pêroyî yê Sendîkaya ELA ya welatê Baskî Mitxel Lakuntza
- Sekreterê Têkilîyanê Mîyanneteweyî yê LAB’î yê welatê Baskî Koldo Saenz de Benito
- Koordînatorê Sendîkaya ESK’yî yê welatê Baskî Patxi Nicolau
- Sekreterê Pêroyî yê “La Intersindical” ê Katalonyayî Sergi Perello
- Katalonya IAC (Intersindical Alternativa de Catalunya)
- Verfeka “Intersindical Valenciana” ya Valenciyayî Beatriu Cardona i Prats
- Serekê Intersindical Solidaria yê Valenciayî Vicent Mauri Genoves
- Sekreterê Pêroyî yê Sendîkaya Karkeran a Endulusî (SAT) Oscar Reina Gomez
- Sekretera Mîyanneteweyî ya Têgêrayîşê Karkeran a Girawanê Kanaryayî (MTC) Lucy Rodríguez.
