Serekwekîla DEM Partî Gulîstane Kiliç Koçyîgît dîyar kerd ke bi taybetî caardişê ‘heqê hêvî’ zaf muhîm o û wina vat: “Ronayîşê şertanê ke goreyê rolê Birêz Ocalanî yê prosesê çareserî û muzakere bibo, seba awankerdişê aştî û komelê demokratîkî zaf muhîm o.”
Serekwekîla Grûba Partîya Demokrasî û Têduştî ya Şaran (DEM Partî) Gulîstan Kiliç Koçyîgît vat ke Tirkîya de averşîyayîşê zaf germî yenê ciwîyayene û badê qerarê “butlanê mutleqî” yê vera CHP’yî xeylê hamleyî yê ke cehd kenê sîstemî bivurnê ameyî kerdene, metodê vetişê qanûnan metodêko demokratîk nîyo û wina vat: “No metod, eşkerakerdişê ewnîyayîşêkî yo ke wazeno heqanê komelî çin bikero, azadîyan teng bikero. Pê nê madeyanê qanûnîyan yeno dîyarkerdene ke kam do bibo hemwelatîyo meqbul, kam ra heq û azadî do bêrê girewtene. Pê naye hem cuya sîyasî hem komelkî hem zî sîstemê huqûqî yeno dîzaynkerdene.”
Gulîstan Kiliç Koçyîgîte bale ante ke qerarê “butlanê mutleqî” manayê hacetkerdişê huqûqî yo û nimûneyê krîzê huqûq û demokrasî yê Tirkîya ra yew o: “Aştî û Komelê Demokratîkî reyde Tirkîya astengêko zaf krîtîk ra vîyarena. Şênberbîyayîş û averşîyayîşê nê prosesî bi çarçeweyêka qanûnî, talebê bingeyînî yê ma û şarê ma yo. Coka ganî verê ke Meclîs bigirîyo, çarçeweya qanûnî bilez bêro rojdem û qanûnê ke Birêz Ocalanî sey hucreya koke îfade kerd, bi lez bêro pêşkêşkerdene û qanûnîbîyayene. Aştî de hewceyîya qanûnî est a, Meclîsî de zî hewceyîya xebata aştî est a.”
Gulîstan Kiliç Koçyîgît vat ke ganî verê canêardişê qeraranê AÎHMî ra fek bêro veradayene: “Caardişê dosyayanê Selahattin Demîrtaş û Osman Kavala yê AÎHM’î bi serran o nêameyo kerdene; no Tirkîya Ewropa de cayêko bin de vindarneno. No tena meseleyêka ferdî nîyo; hetê dewleta huqûqî, serbestîya huqûqî û taahudanê mîyanneteweyî ra zî Tirkîya rastê netîceyanê giranan yena.”
Gulîstan Kiliç Koçyîgît bale ante ke ganî îqtîdar bê ereymendişî hem rojdemê prosesî eşkera bikero hem zî verkarê çarçeweya qanûnî raya pêroyî reyde pare bikero û wina domna: “Bi taybetî cewabgirewtişê ‘heqê hêvî’ zaf muhîm o. Ronayîşê şertanê ke goreyê rolê Birêz Ocalanî bo, averberdişê îmkananê pêdîyayîşî û nîyadayîşê meseleya çarçeweya normanê huqûqê unîversalî de, seba awankerdişê haştî û komelê demokratîkî ê çîyan ra yo ke bê ci nêbeno. Berpirsîyarîyêka girde îqtîdarî ser o ya.”
Peynî de Gulîstan Kiliç Koçyîgît bale ante qerarê Mehkemeya Destûrî yê derheqê nafeqa de û vat ke seba cinîyan kêmasîyêka heqan a girde virazîyaye: “Tîya vurîyayîşêko zaf strukturel yeno kerdene ke wazeno prosesê veradayîşî yê cinîyan zehmet bikero, cinîyan mecbûr bikero ke mîyanê zewacî de ke tede şîdet ciwîyena, bimano.”
