Wendekaranê Unîversîteya Dîcle, vera zêdebîyayîşê qetilkerdişê cinîyan û polîtîkayanê bêcezaverdayîşî rayra şîyê. Wendekaran dîyar kerd ke, ê do îqtîdar û ê kesan ra hesab bipersê ke edalet kerdo amûrê qesre.
Wendekaranê Unîversîteya Dîcle, seba ke vera qetilkerdişê Gulîstan Doku, Rojwelat Kizmaz, Rojîn Kabaîş, Narîn Guran û zaf cinîyanê bînan nêrazîbîyayîşê xo bimojnê, vernîya Fakulteya Fenî de kom bîyî. Wendekaran bi pankartê “Jin jiyan e, jiyanê nekuje” heta Fakulteya Perwerdeyî rayra şîyê. Rayîrşîyayîşî de sloganê sey “Jin jiyan azadî”, “Bîjî berxwedana jinan”, “Mêr dikuje, dewlet diparêze” û “Jinên ciwan dimeşin, erd û ezman dihejin” vatê. Rayîrşîyayîşî ra dima eşkerayîya çapemenî ameye wendene.
‘Delîlî yenê nimitiş, berpirsîyarî yenê pawitiş’
Arjîn Ceylan ke nameyê wendekaran ser o qisey kerd, bal ant krîzê edaletî û polîtîkayanê ke kiştoxan pawenê ser o û wina vat:
“Ewro ma tîya de tenê seba rayîrşîyayîşêk nê, seba vejîyayîşê raştîye kom bîyê. Cinîyî yenê vîndîkerdene, yenê qetilkerdene; gedeyî nêyenê pawitiş, ciwanî cuye ra yenê aqitnayîş. Dima dosyayî yenê qefilnayîş, delîlî yenê nimitiş û berpirsîyarî yenê pawitiş. Çunke no sîstem bi eşkerakerdişê raştîye nê, bi nimitişî aver şono. Dewaya sey Gulîstan, Îpek, Narîn, Rojwelat û Rojîn tesaduf nîyê; nê dewayî berhemê zîhnîyetê dewleta serdest a camêrdan û polîtîkayêka cezanêkerdişî yê.”
‘Ma do hesab bipersê’
Arjîn Ceylan dîyar kerd ke dewlete herinda ke rastîye veja orte, vernîya edaletî de bena astengî û wina domna: “Bi serran o çaresernêbîyayîşê dewaya Gulîstan Doku mojneno ke, no hêzê dewlete vejîyayîşê raştîye de bîyo sey. Na rewşe de, Walî ra bigîre heta polîsan, rektorî ra bigîre heta rayberanê sazgehan, heme xebatkarê pêroyî berpirsîyar ê. Ma do îqtîdar û ê kesan ra hesab bipersê ke huqûqî kerdo amûrê qesre û îqtîdarî ra hesab bipirsê.”
Çalakî bi sloganê “Jin Jiyan Azadî” qedîyaye.
