AMED – Platformê Sazgehanê Demokratîkan, rayberîya xo ya qezaya Pîranî de, vera xizmetkarê mektebî Bekîr Akbaba ke 2 serrî domana 13 serra îstîmar kerdo, rayîrşîyayîş û eşkerayîya çapemenî viraşt.
Platformê Sazgehanê Demokratîkan, rayberîya xo ya qezaya Pîranî de, vera xizmetkarê mektebî Bekîr Akbaba ke 2 serrî domana 13 serra îstîmar kerdo, rayîrşîyayîş û eşkerayîya çapemenî viraşt. Nê rayîrşîyayîşî de ke temsîlkarê partîyanê siyasîyan, hemşaredarî, temsîlkarê rêxistinanê komelê sivîlî û zaf kesî tede bîyî, pankartê “Vera îstîmarî bêveng mendiş, wijdanê komelî tarî keno” ame akerdene û tim sloganê “Jin jîyan azadî”, “bêveng memanê” ameyî vatene. Rayîrşîyayîşî de dowîzê “Jînen ciwan wê hesabê bipirsîn”, “Ma bêveng nêmanenê, ma nêtersenê, ma îtaat nêkenê” ameyî girewtene û badê rayîrşîyayîşî Meydanê Çeşme de eşkerayîya çapemenî ameye dayene. Endama Meclîsê Ciwanan a DEM Partî Merve Oztutuş eşkerayî wend.
Mekanîzmayê pawitişî nêxebitîyenê
Merve Oztutuş îfade kerd ke welat de gedeyî her roje rastê feqîrî û bêparmendişî yenê û vat: “Wazenê ke serê sucan bi zirxê ‘bêcezamendişî’ bîgîrê. Yew geda bi serran hetê camêrdêk ra bi hawayêko sîstematîk rastê îstîmarê zayendî ameya. No çi ma mecbur keno ke ma pêro pîya, heme polîtîkayî û heme komel biqîrê: ‘Domanan rê edalet’. Ma zanê ke edalet tena bi girewtişê failî nêyena ca. Edalete, wexto ke kokê nêweşî û sucan ame birnayene û wexto ke zihnîyet vurîya, o wext mumkin a. Tedayo ke merdimê failî serê mexduran de kenê û ‘beşê polîtîk’ zî ke benê parçeyê nê çî, ê zemînê tarî û o zihnîyetî mojnenê ke îstîmarê gedeyan pîl beno. No zî bêvengî û bêcezamendişî ke bi ters û sîtemî virazîyayê! Bawerîya bi edaletî zî hînî nêmenda. No mesele, netîceyê sîstemêko winasîn o ke mekanîzmayê pawitişî yê gedeyan nêgurîyenê û gedeyî merkez de nêyenê vînayene! Çunke eke yew gede bi serran rastê îstîmarî yeno, uca de tenê faîlêk çin o; uca de mekanîzmayê pawitişî ke nêgurîyenê û sazgehê ke wextê xo de nêkewtê dewre est ê.”
Merve Oztutuş dewamê eşkerayî de nê vatî: “Heqê gedeyan est o ke mîyanê aştî û aramî de bîciwîyê; tewre û ruhê xo bîpawê; bi weşî pîl bîyê. Nê heqî hetê tu sazgeh, polîtîka û kesan ra nêşenê bêrê girewtene û nêşênê bêrê astengkerdiş. Îdiayê îstîmarî û dosyayî wa bê ‘labelê’ û bê ‘feqet’, bi hawayêko şefaf bêre roşnkerdene.”
‘Ma soz danê gedeyan ke ma do komelêko demokratîk awan bikerê’
Dima, Verfeka Komîsyonê Gedeyan ê DEM Partî Berîtan Guneş Altin qisey kerd û vat: “Ma seba deşîfrekerdişê tecawuzê sîstematîk ê ke vera yew gedeyî ameyo kerdene, tîya de yê. Ma zanê ke mektebî hînî merkezê perwerde-musnayîşî nîyê, bîyê cayê sucan. Eke domanî mekteb de rastê sucî yenê, no nîşan dano ke mektebî nê sîstemî ra cîya nîyê. Ma heme gedeyan ra vanê: Ma sucê ke vera gedeyan yenê kerdene qebul nêkenê û ma bêveng nêmanenê. Ma soz danê gedeyan ke ma do komelêko demokratîk awan bikerê. Wa tu doman û tu cinî xo tena hîs nêkerê.“
Eşkerayî bi sloganan qedîyaye.
