Endamê Fermandarîya Merkezê Pawitişê Şarî Murat Karayilanî vat ke îqtîdar gamanê şênberan nêerzeno û teslîmîyetî ferz keno û proses vindarnayo. Ey dîyar kerd ke seba averşîyayîşê prosesî, rolê Rayberê Şarê Kurdî Abdullah Ocalanî û gamê qanûnî şert ê.
Endamê Fermandarîya Merkezê Pawitişê Şarî Murat Karayilanî, verê 1ê Gulane derheqê Prosesê Aştî û Komelê Demokratîkî de erjnayîşêko muhîm kerd.
Karayilanî dîyar kerd ke aşmêk o Rayberê Şarê Kurdî Abdullah Ocalanî reyde kombîyayîş nêameyo viraştene û vat ke na rewşe “normal nîya”, “Aşma nîsane ya ke wezîfedaranê AKP’yî sey aşma eştişê qanûnanê çareserîye dîyar kerdbî, tu kombîyayîşêk Apoyî reyde nêame kerdene. No tena normal nîyo, seba ameyoxê prosesî nîşaneyê xetereyî zî yo.”
Karayilanî vat ke proses ewro vindarnaye yo: “Mehkemeya 27ê adare bi heyetê DEM Partî û dewlete pîya pawitişê girdî afirnabî. La hetê îqtîdarî ra netîceyê xetimîyayîşî prosesî vejîya meydan.”
‘Tu gama şênbere nêameya eştene’
Karayilanî vatişanê ke “înan game nêeşta” red kerdî û vat: “Sey hereket ma karê xo bi temamî kerd. Yew rêxistina ke 42 serran o stratejîya têkoşînê çekdarî dewam kena, peynîya ci ana û xo fesih kena, no qerar ne qerarêko awarte yo.”
Karayilanî gamê ke hetê hereketê xo ra ameyî eştene rêz kerdî: 27ê Adare 2025î vengdayîşê tarîxî yê Apoyî, 1ê Adare adirbest, gulane de Kongreya PKK’yî ya 12. û qerarê fesîhê PKK’yî, 11ê temmuza 2025î de merasîmê veşnayîşê çekan, 25ê êlûle de Vakurî ra vejîyayîş.
Heto bîn ra Karayilanî dîyar kerd ke îqtîdar tena 1ê temmuze ra adirbestî rona û Komîsyonêkê Meclîsî ame awankerdene, la ‘tu gamêka fermî, şênbere çin a.’”
Karayilanî vatişê ‘eke heme çekî û warî bêrê caverdayene, ma do gamanê qanûnîyan bierzê’ red kerdî û vat: “Tîya de teslîmîyet ferz beno. Rojhelato Mîyanên têmîyan bîyo; her ca ra dron û fuzeyî yenê. Bê emnîyetêkê qanûnî, caverdayîşê çekan karê aqilî nîyo. 30 embazê ma yê ke çekê xo veşnayî, eşkayî şêrê cayêk? Ney. Ê mecbûr mendî ke agêrê waranê ma.”
Karayilanî îfade kerd ke şerto tewr bingeyin ê averşîyayîşê prosesî statûyê Rayberê Şarê Kurdî Abdullah Ocalanî yo: “Bê azadîya fîzîkî ya Apoyî, prosesî de tu firsendê averşîyayîşî çin o. Ney, tena ma nêvanê, heme şarê ma vano. Akademîsyenê mîyanneteweyî û çimdarê betarefî zî vanê. Hertim eynî dewayî dinya de bi no hewa ameyê çareserkerdene.”
Karayilanî vat ke meseleya kurdî nêeşkena tena bi caverdayîşê çekan bêro xelesnayene: “Na meseleya qedênayîşê prosesêkê 100 serran ê pêkewtişî ya. Nêzdîbîyayîşê îqtîdarî yo emnîyetperest o. Proses qurbanê hesabanê weçînayîşî beno.”
Kurdîstan, Îran û yewîya neteweyî
Karayilanî bale ant yewîya neteweyî ya kurdan ser o û wina domna: “Yewîya demokratîke hewcedarîyêka tarîxî ya. Konferansê Amedî de Apoyî zî vat ‘yewîya demokratîke hewcedarîyêka tarîxî ya’. Heta ewro nêbîyayîşê yewîye kêmanî û şerm o seba sîyaseta kurdan.”
Derheqê şerê ABD-Îsraîl û Îranî de Karayilanî vat ke ma tîya de terefgir nîyê: “No şerê hêzanê hegemonîkan o. Ma hetê hîrêyin ê. Ma vanê şer ganî bilez bêro qedênayene.” Ey dîyar kerd ke eke hêrişê şarê ci bibê, hereket do paştîdayîşê têkoşînê heqdarî yê şarî bikero.
