Partîya Cuya Azade ya Kurdîstanî (PJAK) 1ê Gulane pîroz kerd û dîyar kerd ke karkerî bi keda xo û îradeyê xurtî bingeyê komelêkê demokratîkî awan kenê.
PJAKî vat ke wexto de ke Komara Îslamî şerî reyde cuya karkeran û çimeyê debara înan tehdîd kena, 1ê Gulane pêşwazî kenê û vat: “Karkerî hêzê afirîner ê cuya komelkî û ekonomîk ê. Ê tena çerxa berhemkerdişî ra nêyenê fetelnayene, eynî wextî de bi keda xo bingeyê komelêko azad û demokratîk awan kenê. La sîstemanê tekelan û dewlet-merkezîyan de no hêzo afirîner û kedkar waranê teng de bîyo wesîleyê kombîyayîşê milkî.”
PJAKî tekîd kerd ke 1ê Gulane roja yewîya heme karkeran, kedkaran, cinîyan, ciwanan û bindestan a û wina domna: “Na roje, roja pîrozkerdişê karkerîye û koletîye nîya, vera her tewir teda û cîyakarîye roja xoverdayîşî ya. Karkerî wexto ke zincîranê koletîya moderne ra azad bibê, do bibê pawitoxê raştikênî yê cugehî. Azadîya karkeran azadîya xoza ya.”
PJAKî vat ke Îran û Rojhelatê Kurdîstan de karkerî her roje bi destê hukmatî feqîrîye, bêkarîye, neheqîye û heqê asgarî reyde rî bi rî yê, çalakî û protestoyê serranê peyênan giranîya na rewşe û qewetê îradeyê karkeran mojnenê.
PJAKî dîyar kerd ke şerê Îsraîl û Amerîka reyde, feqîrî, enflasyon û bêkarîya karkeran de zêde bîya û wina vat: “No şer çimeyê debara bi mîlyonan keyeyanê karkeran resna xetimîyayîşî. Karkerî nêwazenê bibê qurbanê pêkewtişanê îqtîdarî. Ê şer û teda ney, azadîye wazenê. Yewin rayîrê naye averberdişê têkoşînê sîvîlî yê karkeran o.”
PJAKî peynî de wina veng da: “Ma heme şarê kurd, bi taybetî karkerî, kedkaran, cinîyan, ciwanan, roşnvîran û çalakîkeran dawet kenê ke 1ê Gulane de çalakî û têkoşînê xo yê bingeyê ‘Azadîya Apoyî û Çareserîya Meseleya Kurdî’ biresnê tewr cor.”
Eşkerayî de sewbîna ame îfadekerdene ke 1ê Gulane serrgêra şehadetê şehîdanê Komîteya Çapemenîye ya PJAK’î zî yo û sozê resayîşê amancanê şehîdan ame newekerdene.
