Verfeka Çapemenî ya PJAK’î Gelawêj Ewrîn, îdiaya ‘çek dayena kurdan’ ser o vengdayiş kerd û vat: “Serekê DYA’yî Donald Trump çekî dayê kamî wa eşkera bikero.”
Serekê DYA’yî Donald Trumpî bi vatena “Ma bi rayîrê kurdan xeylê çekî çalakîkeranê Îranî rê erşawitê. Ez fikirêna ke kurdan nê çekî xo rê girewtê, coka ez zaf bêhevî bîya” rojanê peyênan de hetê xeylê derûdoran ra reyna zî yeno munaqeşekerdene. Hinî derûdorî nê eşkerayîyan bi kar anê û hewl danê ke kurdan bikerê hedef. Badê şîyayîşê Trumpî yê Çînî ra dima yeno vatene ke vera Îranî seba ke netîce bigîrê do planêk newe bikewo dewre, tekrarbîyayîşê nê munaqeşeyan beno sebebê reaksîyonan.
‘Kamî çekî girewtê ganî eşkera bikerê’
Verfeka çapemenî ya PJAK’î Gelawej Ewrîn, dîyar kerd ke agêrayîşê mudaxeleyêk newe Îranî ser est o û seba ke munaqeşeyê derheqê çekan bi qedîyê wina vat: “Serekê DYA’yî Donald Trumpî çekî dayê kamî wa eşkera bikero.” Gelawêj Ewrîn sewbîna vengdayîşê partîyanê kurdan zî kerd û wina dewam kerd: “Kamî çi çekî girewtê wa eşkera bikerê û zêdeyêr na rewşe lêl mekerê.”
‘Vera Îranî îhtîmalê mudaxeleyî est o’
Gelawêj Ewrîn bale ante serê îhtîmalê pêkerdişê DYA û Çînî yê serê hinî babetan û wina qisey kerd: “Do vera Îranî reyna mudaxeleyêke bêro kerdene. Beno ke wextê ci kilm bo, la do bi tesîr bo. Serê babeta ke ganî Îran nêbo wayîrê çekê nukleerî de mabênê DYA û Çînî de pêameyîş est o. Sewbîna Neqebê Hurmuzî seba Çînî zaf muhîm o û do hewl bido DYA’yî reyde hinî peymanan virazo.”
‘Ganî Trump eşkera bikero’
Gelawêj Ewrîn, derheqê eşkerayîya Trump û hewldayîşê hinî derûdoran ê seba hedefkerdişê kurdan cewabêko zelal da û nê çîyî ardî ziwan: “Ma sey PJAK’î Trumpî ra vanê ‘Tu nêeşkenê şarê kurdî bi naye sucdar bikerê ke qaşo to çekî dayê înan û înan zî çekî bikar nêardê’ Ma serê herra Îran û Rojhelatî de est ê. Hem warê sîyasî de hem zî warê leşkerî de hêzê ma est o. Ma tu hêzê ke ra çekî nêgirewtê. Eke DYA’yî çekî dayê hinî hêzan, wa bi eşkera îlan bikerê ke dayê kamî û kamcîn partîyanê sîyasî. Wa tu kes kurdan tehdîd nêkero û nêvajo ‘ma çekî dayê înan’ Manayê nê tehdîdan no yo ke hem wazenê Îranî vera kurdan sûr bikerê hem zî wazenê bawerî û pêbawerîya şarê ma yê bi ma bidê şikitişî. Şarê ma zano ke heta ewro ma bi hêzê xo ameyê. Hêzê ma cayêko hewce pê bibo do mudaxeleyê xo zî bikero.”
‘Babete lêl mekerê’
Gelawêj Ewrîn peynîyê qiseykerdişê xo de vengdayîşê partîyanê kurdan zî kerd û wina domna: “Sewbîna partîyê sîyasî yê kurdan zî eke DYA’yî ra çekî girewtê, wa naye eşkera bikerê. Lêlkerdişê rewşe ya bi no hawayî feydeyê tu kesî nîyo. Qicvistişê kurdan ê bi nê metodî zî rewşa ke qetî nêyena qebulkerdene. Kurdî herême de aktorê sereke yê. Hêzê înan zî est o; hêzê ma yo bingeyin zî şarê ma yo.”
