Wan de bi hezaran kedkar û karkerî bi waştişê “Kede, edalet, seyyewbînî, aştî û demokrasî” rayra şîyî.
Mitîngê 1ê Gulane ke bi rayberîya sazgeh û dezgehanê kede yê Wanî bi piştgirîya partîyanê sîyasî û sazgehanê demokratîk yeno organîzekerdene, bi beşdarîya des hezaran karker û welatijan dest pêkerd. Girse, ewilî verê Nêweşxaneyê Heyatî de ame têhet û tîya ra heta Qada Şaristanî ya qezaya Rayîrê Armûşê ke mitîng tede yeno organîzkerdene, rayra şi. Rayîrşîyayîşî de komelanê rojnamegeran ê DFG û MKG’yî reyde sendîka û partîyanê sîyasî bi kortejanê xo ca girewt. Hemsereka Pêroyî ya DEM Partî Tulay Hatîmogullari û Hemserekê Pêroyî yê KESK’î Ahmet Karagoz, bi hezaran karker, kedkar û welatijan reyde beşdarê rayîrşîyayîşê 1ê Gulane bîyî.
Rayîrşîyayîşî de heme sendîka û sazgehî bi pankartanê xo yê ke ser o“Biciwîyo 1ê Gulane” nuseno, ca girewt û sloganê “Nazimî ra hetanî Cîhan Çapemenîya Azade tîya ya”, “Biciwîyo 1ê Gulane”, “Biciwîyo xoverdayîşê karkeran” û ûsn. ameyê vatene. Sewbîna Komela Wendekaranê Komun ê Unîversîteya Yuzuncu Yilî (KODER) zî pankartê “Ewro çerxê şorişî bi komunan rayra şino, biciwîyo 1ê Gulane” akerd û rayra şîyî.
