Amedspor ewro deplasman de Igdirsporî de yeno têver. No maç semedê Amedsporî zaf muhîm o. Amedsporî maçî ra ver dîmenêko Kurdkî vila kerd û no dîmen hetê se hezaran kesan ra ameyo ecibnayene û no ecibanayiş dewam keno. Amedsporî dîmenê xo de îfade kerd ke no tena maçek nîyo, hîkayeyê serran o yeno nuştene û gam bi gam gird beno.
Taximê Amedsporî hewteyo peyîn yê Lîgê 1. ê Trendyolî yê TFF’î de ewro saete 16:00î de beno mêmanê Igdirsporî. No hewte seba vejîyayîşê Lîgê Sûperî semedê Amedsporî zaf muhîm o. Eke Amedspor vera Igdirsporî ser bikewo do rasterast derbasî Lîgê Sûperî beno.
‘Zerê mîlyonan de yew amanc esto’
Amedsporî maçî ra ver dîmenêko Kurdkî vila kerd. Dîmenêko ke hetê se hezaran kesan ra yeno ecibnayene de wina yeno vatiş: “Zerê mîlyonan de yew amanc esto. No tena maçêk nîyo. No bawerîya miletêk û karakterê taximêkî yo. Roja ke ma na forma daya xo ra, ma zanitêne ke ma seba çi rayîr ra şinê. Bi rehetî nêvirazîyo do bi rehetî zî nêvirazîyo. La ma tu rey rehetîye nêweçînite. Her susike de, her xoverdayîş de ma hêzdar bîyê. Ma zafêr pişta yewbînan girewt.”
Bi mîlyonan kes paweyê nê maçî yo
Dîmenî de kaykerdoxî zî ca gênê û peynîye de sloganê bawerîya taximî yena berzkerdene. Seba nê maçê krîtîkî xeylî şaredarîyanê Partîya DEM’î eşkera kerd ke ey do salon, qad û parkanê şaristananê xo de ekrananê girdan ronê ke heskerdox û terefgirê Amedsporî bieşkê maçî pîya temaşe bikerê. Sewbîna zi zaf cayanê Ewropa û Amerîka de zî terefgirî Amedsporî maçî temaşe bikerê. Çimê mîlyonan kesî do ewro maçî Amedsporî de bo.
