Hemserekê Pêroyî yê DBP’yî Keskîn Bayindirî vat ke vengdayîşê 27ê Adare yê 2025î tena adirbestêk nêbi, îradeyêko tarîxî yê seba çareserîya demokratîke ya meseleya kurdî bî. Ey dîyar kerd ke bê bingeyêkê qanûnî aştî nêeşkena aver şêra.
Keskîn Bayindirî dîyar kerd ke vengdayîşê Rayberê Şarê Kurdî Abdullah Ocalanî pêşnîyazê peymanêka newa ya komelî ya bingeyê yewwelatîya seypêyîperwer ser o awankerde yo û vat: “No vengdayîş seba caardişê ewro nê, seba awankerdişê ameyoxî yo.”
Keskîn Bayindirî nêzdîbîyayîşê dewlete rexne kerd û wina domna: “Tesadûf nîyo ke 1,5 serran de dewlete tu gamêka şênbere, pêt û qanûnî nêeşta. Aqilê dewlete yê tradîsyonê puçkerdişê çareserî est o. Îqtîdar aştî sey wesîleyêka taktîke ya dergkerdişê emrê xo yê sîyasî vîneno. Tirkîya hema zî stratejîya ‘pê redkerdişê kurdan payra mendiş’ nêeşkaya abirîya.”
Keskîn Bayindirî îfade kerd ke problemê ekonomîkî resayî zîrwe û vat: “Pereyê girsî yê bûtçeyî dîyayê şerî. Her roja ke qanûnê aştî nêvejîyê, ereqê çareyê kedkaran beno bombe û fîşege. Seba naye waştişê aştî eynî wextî de waştişê nan û edaletî yo.”
Keskîn Bayindirî muxalefet zî rexne kerd û wina vat: “Berpirsîyarîya îqtîdarî girs a, la muxalefet zî teberê naye de nîyo. Sîyasetêko ke meseleya kurdî tena dema weçînayîşan de yena vîrî, îflas kerdo. Eke çarçewayêka qanûnî nêba, no proses her saete eşkeno agêro sey verê.”
Keskîn Bayindirî peynî de dîyar kerd ke azadîya fîzîkî ya Rayberê Şarê Kurdî Abdullah Ocalanî lazimtî ya û wina qedêna: “Gama tewr muhîm a seba averşîyayîşê prosesî, hewanayîşê rejîmê tecrîdî yê Îmraliyî yo. Bê azadîya Rayber Apoyî, averşîyayîşê prosesî mumkîn nîyo. Bi tecrîdkerdişê muxatabî, aştî nêyena awankerdene.”
