Amed – Şaredarîya Erxenî mabênê 7 û 10ê Gulane de “Rojê Kitaban ê 2.” virazena. Hemşaredara Erxenî Bîrsen Azak Bayar dîyar kerd ke bi amancê awankerdişê ameyoxêk û komelêko demokratîk Rojanê Kitaban virazenê û veng da her kesî ke beşdar bibê.
Bi serekîya Şaredarîya Erxenî, mabênê 7 û 10ê Gulanede bi hemkarîya Yewîya Weşangeranê Kurdan (YEWKURD) û Şûbeyê Egîtîm Senî yê Amedî yo 3., Park Ormanî de “Rojê Kitaban ê 2.” yê Şaredarîya Erxenî yenê viraştene. Rojê Kitaban bi amancê pawitişê kulturî, zimanê dayîke û têkoşînê vera polîtîkayanê asîmîlasyonî yeno viraştene. Nê fuarî de ke 40î ra zafêr weşanxaneyî û 61 nuştoxî do beşdar bibê, gelekî panelî, gotûbêjî û aktîvîteyê cîyayî yenê viraştene.
Meymananê bernameyî mîyan de kesayetê sey Kemal Varol, Sebahat Tuncel, Metîn Aktaş û Gultan Kişanak estê. Reyna çarçoveya bernameyê hîrê rojan de, do 23 panelî û gotûbêjî seba ciwanan û wendanoxan bîyerê viraştene. Standan de do her ziman û nasname ra berhemî, bi taybetî zî berhemê bi zimanê Kurdkî (Kirdkî/Kurmanckî) bîyerê nîşan dayene. Hemşaredara Erxenî Bîrsen Azak Bayar, derheqê amadekarîyanê Rocanê Kitaban û girîngîya wendişî de ajansa ma rê qisey kerd.
‘Vera Polîtîkayanê Şerê Taybetî Bersîvêka’
Hemşaredar Bîrsen Azak Bayar destpêkê qiseykerdişê xo de bal ant polîtîkayanê asîmîlasyonî ser o. Bayar dîyar kerd ke nê Rojê Kitaban sey helwestêk ê û wina vat: “Amancê ma yo sereke o yo ke ma vera polîtîkayanê şerê taybetî yê ke bi taybetî ciwan, keyna û xortanê ma ser o yenê rayraberdene, bivindarnê. Her ke ciwanê ma tarîx û nasnameyê xo ra dûrî kewenê, hende kewenê binê pencanê nê sîstemê lêminî. Naye ra ma sey rayerberîya şaredarîye, nê Rojanê Kitaban ê Dîyinan virazenê.”
‘Tarîx nê deman de, ameyox zî ewro de nimite yo’
Bîrsen Azak Bayar dewamê qiseykerdişê xo de muhîmîya wendiş û awankerdişê komelêko demokratîk ard vîrî û wina vat: “Ciwanê ma çend kitaban biwanê û xo bişinasnê, hende weş ameyox û tarîxê xo fehm kenê. Amancê ma yo bingehîn awankerdişê ameyoxêk û komelêko demokratîk o. Eke ciwanî nêwaanê, nêşinê tarîxê xo fehm bikerê û awankerdişê komelêko demokratîk nêbeno amancêko mumkin. No sîstem tena bi zanayîşê ameyoxî, bi wendiş û bi naskerdişê tarîx û ziwanê xo yeno awankerdene.”
‘Rayerberîyê herêmî berpirsîyar ê’
Bîrsen Azak Bayar dîyar kerd ke rayerberîyê herêmî warê pawitişê ziwanê dayîke de wayîrê berpirsîyarîyanê pîlan ê û wina dewam kerd: “Ziwan çend zengîn bo, awankerdişê cuye zî hende zengîn o. Her ke dayîkêk bi ziwanê xo gedeyê xo reyde qisey bikera û gede bi ziwanê dayîke biwano, do ameyoxê ê gedeyî zî hende roşn bibo. Lazîm o ma tena bi qiseykerdişî sînordar nêmanê; ganî ciwanê ma bi wendiş xo awan bikerê.”
Vengdayîşê beşdarîye
Hemşaredar Bîrsen Azak Bayar peynîya qiseykerdişê xo de, veng da heme şarê Erxenî û derûdorî û vat: “Rojê Kitaban ê ke do 7ê Gulane ra heta 10ê Gulane dewam bikerê, wa şarê ma verê xo bido qadê Park Ormanî yê Yenîşehîrî û paştî bidê na xebata manadare.”
