Baroyê Dêrsimî ra Avûkat Fatma Kalsen, Terteleyê Dêrsimî ser o wina vana: “Dewlete 89î serrî yo ke bê edeletîye kena. Dewlete cayê Sey Rizayî û hevalanê ey eşkera bikero, qirkerdişî qebul bikero, hetê huqûqî ra çi lazim o bikero û ozrê xo biwazo.”
Qerarê fermî yê Terteleyê Dêrsimî ser o 89î ser verdî ra. A roje ra heta na roje dewlete hîna qirkerdiş qebul nêkerdo û no derheq de gamêka rinde nêşta. Heto bîn ra polîtîkayanê xo yê înkar û asîmîlasyonî zî dana ramitene.
Şarê Kirmanc wazeno ke cayê mezelanê pîrîk û kalikanê xo, merdeyanê xo bizano. Dewlete cayê nînan eşkera bikero, qirkerdişî qebul bikero, hetê huqûqî ra çi lazim o bikero û ozrê xo biwazo.
Baroyê Dêrsimî ra avûkat Fatma Kalsen no derheq de ajansê ma (AW) rê qisey kerd.
‘Êdî bes o aştîye bêro’
Avûkat Fatma Kalsene qiseykerdîşe xo de wina vat: “89î serrî bîyo ke sarê Dêrsimî rindîye nêdîyo. Zon û îtîqatê xo jê waşten û vatena xo nêramneno. Zaf qirim dîyo, Tertele dîyo. Ganî dewlete no derheq de hesab bîda.
Naye ra tepîya ma vazenîme ke aştîye bêra, xortê ma nêmirê. Kes nêmiro. Kes merdene nêwazeno. Êdî bes o. Sarê ma wazeno ke, Şaredarîya xo bîjêro destê xo. Xo bi xo îdare bikero. Zonê xo kultirê xo aver bero.”
‘Mezelanê pîy û kalikanê xo bizanîme’
Fatma Kalsen, vatena xo wina domnaye: “Sarê Kirmanc, wazeno ke cayê mezela Sey Rizayî û hevalanê ey hetê dewlete ra bêro eşkerakerdene. Domanê înan û tornê înan bieşkîyê şorê serê mezelanê înan de çilayan bivêşnê, herdê înan paçî bikerê. Goreyê îtîqatê xo nîyaz bikerê. Dewlete gerê no hete gaman bierzo. Ma îtîqat û kulturê xo, zereyê ma ra çutur ke yeno wazenîme ke hînî biramnîme.”
