Dewa Cafranî (Dallitepe) ya girêdayeyê Çewligî ya, uca de talankerdişê birrî dewam keno. Dewijî terba Muxtarê dewe seba ke birrê dewe nêbirîyo reaksîyon mojnenê, waştişnameyan danê heme sazgehanê dewlete la reyna zî talan dewam keno.
Merkezê Çewlîgî de dewa Cafranî de birnayîşê daran o ke serra 2023î de bi destê mudir û şefê daîreyê ormanî û dewijan ra Çelebî Kîşîn û Serkan Kîşînî amebî talankerdene wisarê 2026î ra game bi game reyna yeno birnayene.
Dewijan û muxtarê dewe çend hewteyî naye ra ver waştişname dayî sazgehanê dewlete, walîyê Bîngolî de qisey kerdbi û walî sozê vindarnayîşê birnayişî dabi ci. Mudirê Herêma Ormanî yê Elazizî de qisey kerdbi, ey zî sozê vindarnayîşî dabi. Wekîlanê sîyasîyan ê partîya îktîdarî de qisey kerdbi, înan zî sozê vindarnayîşî dabi dewijan. La nê sozan ra çîyêk nêvejîya. Kes pê na mafyaya birî nêeşkeno û talanê birrî dewam keno. Waştişnameyê dewijan û muxtarê dewe cayê de resmî yew muamele nêvînenê. Birrnayîşê nê birrî tena nebatê endemîkî nê û gandarê mîyanê birrî zî zerar vînenê.
Dimayê muracatanê dewijan ganî ewro yew heyetê keşfî saete 10î de bişîyêne cayo ke birr birîyeno la deqaya pêyêne de ame betalkerdene. Dewijî vanê, “Cayê ra mudaxaleyê na heyete ame kerdene, nêke ameyêne.”
Şodir rew dewijî şîyê koyê Cafranî û diyo ke hîna zî birr yeno birnayene. Dewijan ma rê vîdeo û resmê daranê ke ameyê birnayene ruşnayî.
Goreyê vatena dewijan yew mafyaya ormanî ameya viraştene û Çewlîg de çi daristanî est ê yew bi yew mîyanê xo de pare kenê û rantê ey wenê.
