Bado ke vizêr cezaya hepisî ya 6 serran û 3 aşman dîyaye Hemşaredara Sêrtî Sofya Alagaş, Şaredarîya Sêrtî rê qeyûm ame tayînkerdene
Hemşaredara Sêrtî Sofya Alagaş wexto ke rojnamegerîye kerdêne derheqê ci de bi îdîaya ‘endamîya rêxistine’ dewa ameybî akerdene. Vizêr Mehkemeya Cezaya Girane ya 5. ya Amedî de cezaya 6 serran û 3 aşman dîyaye Hemşaredare Sofya Alagaş.
Wezaretê Karanê Zereyî yê Tirkîya bado ke ceza dîyaye Sofya Alagaş qeyûm tayînê şaredarî kerd. Polîsanê ke derûdorê şaredarî girewt binê ablûqa vat herinda hemşaredaran de qeyûm ameyo tayînkerdene.
Dima ra Wezaretê Karanê Zereyî yê Tirkîya eşkera kerd ke Hemşaredara Sêrtî Sofya Alagaş wezîfe ra ameya girewtene û herinda ci de Walîyê Sêrtî Kemal Kizilkaya sey qeyûmî ameyo tayînkerdene.
Bado ke Şaredarîya Sêrtî rê qeyÛm ame tayînkerdene şar verê şaredarî de ame pêser û verba qerarî nêrazîbîyayîş mojna.
Wekîla DEM Partî ya Sêrtî Sabahat Erdogan Saritaş verab qeyûmî hêrsê xo ard ziwan û vat ê na darbeya verba îradeyê şarî qebul nêkenê û verba qerarî do xo verbidê.
Hemserekê DEM Partî yê Sêrtî Eşref Tekinî zî vat: “Îqtîdaro ke bi diznayîşê rayan zî nêeşkeno şaredarî bigîro şaredarîya ma xesp keno. No şar şi sindoq ser û hemşaredarê xo vîjnayî. Nê kerdişî verba sindoqî bêhurmetîye ya, derba ya.”
Polîsan waşt hemwelatîyan û partîyijan şaredarî ra vejo la şarî verba nê nêrazîbîyayîş mojna. Polîsan hêriş kerd û hîrê kesî destbend kerdî. Badê hêrişî şarî verê şaredarî de dest bi çalakîya roniştişî kerd.
Vîjnayîşê 31ê adare ra nata Şaredarîyê DEM Partî yê Colemêrg, Mêrdîn, Batman, Dêrsim, Xelfetî, Akdenîz, Bahçesaray û Sêrt ameyî xespkerdene.
