Hemserekê Pêroyî yê DEM Partî Tuncer Bakirhan, kombîyayîşê grûba partîya xo yê Meclîsî de qisey kerd. Bakirhanî dîyar kerd ke seba averşîyayîşê prosesî, ganî dewlete gamêkê lazimî bilez bierza û nê vurnayîşan bi ziwanê hiqûqî bikerê.
‘Ganî gamê Lazimî bilez bêre eştiş’
Bakirhanî bale ant prosesê Aştî û Komelê Demokratîkî ser o û vat: “Bahçelîyî zî vat ke lazimtî bi xo xejilîyayîşî çin a. La kamî ra vano? Kam ganî gaman bierzo? Ganî gamê lazimî bilez bêre eştiş. Seba nê karî zî, bêyî ke qanûnê neweyî bêrê viraştene, eşkenê qeraranê Mehkemaya Heqanê Merdiman a Ewropa (DMME) bîyarê ca û sîstemê qeyûman biqedînê.”
Vera tedayanê muxalefetî reaksîyon mojna
Bakirhanî tedayê hukmatî yê vera muxalefetî rexne kerdî û vat: “Îqtîdarî seba qelskerdişê muxalefetî hiqûqî xebitîyeno. Goreyê partîyan hiqûq nêbeno. Wezîrê Karanê Zereyî vano hezar û 48 şaredarîyan ser o cigêrayîş est o. Nînan ra 472ê ci AKP, 217ê ci CHP’yî û tena 16 hebî yê DEM Partî yê. Labelê qeyûmî tena seba muxalefetî yenê şuxulnayene. Ma na nehiqûqîye qebul nêkenê.”
Seba îqtîdar û muxalefetî vengdayîş
Tuncer Bakirhanî veng da îqtîdar û muxalefetî ke wa bêre têhet û wina vat: “Seba ke mîyanê nê kaosî Rojhelatê Mîyanênî de Tirkîya de aramî biba, ma veng danê heme terefan ke bêre têhet. Eke sîyaset asayî bibo, ekonomî zî do baş bibo. Ganî akademîsyenê aştî zî agêre serê karê xo.”
‘Mîyanê feqîr û zengînan de cîyakarîyêka girane est a’
Bakirhanî bale ant krîzê ekonomîkî ser o û dîyar kerd ke êdî teqawîtî û karkerê bi meaşê asgarî nêeşkenê debara xo bikerê û wina domna: “Tîya de şer çin o la şerê ekonomî est o. Meaşê asgarî bes nêkeno. Ganî polîtîkayêka winasîne bêra viraştene ke verê krîzî bigîro û piştgirî bido welatîyan. Sewbîna ganî qadê ekonomî zî demokratîk bibo.”
Bakirhanî peynîya qiseykerdişê xo de xoverdayîşê vera talankerdişê xozaya Gimgimî zî silam kerd û va ke ê do her tim vera talanî vinderê.
