Verfeka DEM Partî Ayşegul Dogan, merkezê pêroyî yê partîya xo de derheqê kombîyayîşê Heyetê Rayraberdişê Merkezî (MYK) de eşkerayîyêka hîra daye. Ayşegul Dogan dîyar kerd ke seba awankerdişê aştî, statuyê Rayberê Şarê Kurdî Abdullah Ocalanî lazimtîyêka bingehîn o û vat: “Ganî heyetê ma bilez birêz Abdullah Ocalanî reyde pêvînayîş bikero.”
Ayşegul Dogan sere de seba merdimanê ke bobelatanê xoza de cuya xo ra bîyê serweşîye waşt û bal ant krîzê îklîmî ser o. Reyna, serfîrazîya Amedsporî pîroz kerd û vat ke Amedsporî vera heme tedayan ser kewt û bi hêvîya heme şaran.
Statuyê Rayberê Şarê Kurdî Abdullah Ocalanî
Ayşegul Dogan destnîşan kerd ke seba averşîyayîşê pêvajoya aştîye, statuyê Abdullah Ocalanî îhtîyajêko herî sereke yo: “Hem seba awankerdişê aştîye hem zî seba akerdişê rêyanê sîyasîyan, ganî şert û mercê birêz Ocalanî ke aktorê sereke yo, bêrê weşkerdene. Nîqaşê serê xitimîyayîşê pêvajoye zî estê; ma sey Partîya DEMî seba çareserîya nê pirsan hewl danîme.”
‘Ganî prosesê viraştişê qanûnan erey nêkewo’
Ayşegul Dogan dîyar kerd ke seba viraştişê qanûnan ganî sîyaset gamanê bicesaret bierzo û wina domna: “Fesîhkerdişê PKK’yî ser ra serrêk derbas bîye û nê wextî de gamê tarîxî ameyî eştene. Raybera Rêxistine Besê Hozate zî tede, endamanê rêxistine çekê xo veşnayî. Labelê viraştişê qanûnan de ereykewtiş est o. Ma vanî ke ganî qanûnî heme xo de bihewînê û sîyaset zî bi ziwanê serdemê neweyî, mîyanê çarçewaya huqûqî de têbigêro.”
‘Ganî birêz Ocalanî reyde biserûber pêvînayîşî bêrê kerdene’
Ayşegul Dogan dîyar kerd ke ganî birêz Ocalan fîkr û ramanê xo rasterast komelî reyde pare bikero: “Ma sere de vat ganî birêz Ocalan bieşko rojnameger û raya pêroyî reyde fikir û ramananê xo pare bikero. La heta nika heyetê ma ey reyde pêvînayîş nêkerdo û no zî komel de fikaran virazeno. Seba ke nê fikarî wedarîyê, ganî pêvînayîşê biserûber bêrê kerdene û birêz Ocalan bieşko fikranê xo rojnameger û raya giştî reyde pare bikero.”
‘Ma do aşma êlule de kongreya xo virazê’
Ayşegul Dogan dîyar kerd ke ê do aşma êlule de kongreya xo virazê û wina dewam kerd: “Ma do şaristan û qezayan de konferansan virazê. Na kongre do biba kongreya ‘reyna awankerdişî’. Heta ke konferansan de nêro munaqeşekerdene, xeberê sey vurnayîşê nameyî yan zî logoyî raşt nîyî; hema qerarêko winasin çin o.”
Ayşegul Dogan bal ant krîzê aborî ser o û vat ke ganî goreyê rastî û îhtîyacîyanê komelî polîtîkayî bêrê dîyarkerdene û wina vat: “Hemşaredarê ma yê Colemêrgî Mehmet Siddik Akiş bi şeklêko ne huqûqî ame cezakerdene. Hemsereka ma ya Pêroyî Tulay Hatîmogullari do ewro şêra zîyaretê ey. Badê zîyaretî do hîna zêde agahîyan pare bikera.”
Ayşegul Dogan dewamê qiseykerdişê xo de 15ê Gulane Roşanê Ziwanê Kurdkî pîroz kerd û nê çîyî vatî: “Kurdî awankerdişê komarî ra heta nika binê tedayanê dewlete de yê. Ewro zî tedayê vera Kurdkî û astengkerdişê heqê perwerdeyê bi ziwanê Kurdkî dewam kenê. Ganî astengîyê vera ziwanê dayîke bêrê wedaritene û heme şarê Tirkîya bi ziwanê xo yê dayîke bieşkê perwerde bivînê.”
Ayşegul Dogan persê statuyê Rayberê Şarê Kurdî Abdullah Ocalanî ser o zî ke Serekê Pêroyî yê MHP’yî Devlet Bahçelî bêvengîya Serekkomarî îfade kerdbî, dîyar kerd ke statuyê Abdullah Ocalanî lazimtîyêka bingehîn o. Ayşegul Dogan vat ke ganî heyetê înan zî bilez birêz Abdullah Ocalanî reyde bêro têhet.
