Nûretîn Ataman na 34 serrî û 4 aşmî girewteyo û veradayîşê ey 13 Gulane de 6 aşmî bîne ame taloqkerdene. Bûrê Nûretîn Ataman, Masum Kara derheqê taloqkerdena veradayîşê Nûretîn Ataman de dîyar kerd ke Nûretîn Ataman vera înan vano, ‘ez est a’ û derheqê babete de wina vat: “Nûretîn Ataman pêvînayîş de mi ra vat bî ’34 serra bînê zî bêrî girewtene ez nêvana ez poşmana. Gonîya mi û arisayîşê mi bîyo hereketê kurdî. Ma girêdayê hereket û Serokê xo yê.”
Nûrettîn Ataman serra 1993 de Amed de ame girewtene û cezaya muebetî girewte. Nûretîn Ataman na 33 serrî û 4 aşmî girewteyo. Nûretîn Ataman hepisxaneyanê Yozgat, Mûş û Baybûrtî de ameyo girewtene û tewr peynî de zî o berdo hepisxaneyê Bolûyî û nika uca de girewteyo. 13ê Gulane de hepisxaneyê Bolûyî ra ganî Hîkmet Akbaş, Ahmed Abdî Îbrahîm, Tuncay Dogan û Nûretîn Ataman biameyene veradayene la Heyetê Îdarî û Şopnayîşî yê Hepisxaneyî veradayîşê Ahmed Andî Îbrahîm, Tuncay Dogan û Nûretîn Ataman 6 Aşmî bînî taloq kerd. Masum Kara derheqê rewşa bûrê xo Nûretîn Ataman de qisey kerd û bale ante serê nêveradayîşê bûrê xo.
Nûretîn Ataman 33 serrî û 4 aşmî girewteyo
Masûm Kara dîyar kerd ke Nûretîn Ataman serra 1993 de ame girewtene û wina vat: “Nûretîn Ataman Amed de ame girewtene û dima ra hepisxaneyê Yozgat, Mûş û Baybûrt de girewte mend û 2017 ra nat zî hepisxaneyê Bolûyî de yeno girewtene. Rayberîya hepisxaneyî heqê cereyanî û awe girewteyan ra gêna. Verê çend serran wextê arisayîşî înan çend saetî bî, la çiqas şino wextê înan kenê kêmî. Heqê girewteyanê sîyasîyan yenê binpaykerdene. Wexto ke ma şinê pêvînayîş gardîyanî serê sereyê ma de vindenê. Nûretîn Ataman vano ke înan ra yeno vatene şima do vejîyê vernîya heyê îdarî û şopnayîşî la ma nêvejênê vernîya heyetî tena ma îmza erzenê kaxidêke. Xora ma zanê ke vatişanê corî girewteyê sîyasî yenê veradayene.
‘Ma girêdayê hereket û Serekê xo yê’
Nûretîn Ataman pêvînayîşêk xo de vat bî ke ‘34 serra bînê zî ez bêrê girewtene ez nêvana ez poşmana. Gonîya mi û arisayîşê mi bîyo hereketê kurdî. Ma girêdayê hereket û Serekê xo yê’ Nûretîn Ataman her wext goreyê hereketî têgêreno. Badê prosesê Aştî û Komelê Demokratîk dest pêkerd xeylê reyan ma Nûretîn Ataman reyde pêvînayîş viraşt. Ma ra vat eke dewlete samîmî bo prosesî baş vîneno û vano aştî her wext şerî ra başêr a.
‘Ma wazenê girewteyî bêrê veradayene’
Masûm Kara dîyar kerd ke ganî nê prosesî de girewteyî bêrê veradayene û qisey kerdişê xo wina qedêna: “Pêameyîş her wext baş o. Ma wazenê girewteyî bêrê veradayene, sere de ganî girewteyê nêweşî bêrê veradayene. Tibê edlî xeylê reyan vat ‘wa girewteyê nêweşî bêrê veradayene’ la dewlete girewteyê nêweşî veranêdayê. Ewro dewleta Tirkîya huqûq nas nêkena. Keyeyî wazenê girewteyî bilez bêrê veradayene.
