Sîyasetmedara SPOyî Petra Bayr, Sereka Koma Karî ya Cinîyan a Keskan, Wekîla Meclîsa Parlamenteran ê Konseya Ewropa û Sereka Komîsyonê Weçînayîşê Edlî yê Meclîsê Parlamenteran ê Konseya Ewropa sîyasetmedare Petra Bayr roja çarşemeyî eşkerayîyêke daye.
Petra vat: “Bomvardimanê vera Awbendê Tişrînî binpaykerdişê heqanê merdiman ê. Qestî ra binawanîye yena hedefkerdene. Awbendo ke bi mîlyonan merdimî tira îstîfade kenê gêrîyeno binê tehlukeyî.”
Artêşa tirke û çeteyê ci nêzdîyê 2 mengî yo bêmabên hêrişê Awbendê Tişrînî yê Kobanê kenê. Awbend qanûne ra nata nêxebitîyeno û qasê 400 hezar merdimî bê awe û bê ceyranî mendê. Hêrişanê vera awbendî de qasê 20 sivîlî ameyî qetilkerdene û tewr tay 200 sivîlî birîndar bîyî.
Îdareyo Xoser seba pawitişê awbendî tim veng dano. Petra Bayr tewrê nê vengdayîşî bîye û waşt ke vera hêrişan cade ‘tedbîrê lezabezî’ bigêrîyê. Petra vat: “Seba ke verê pîlbîyayîşê serebûtan bigêrîyo, seba pawitişê heqanê şarê sivîlî ganî asta mîyanneteweyîye de gamê qerardarî û lezî bierzîyê. Pawitişê binawanîye û çimeyanê awe seba aramîya herême û haştîye şerto sereke yo.
Wa herêmanê kurdan de şer bi temamî biqedo. Şarê Sûrîye û Rojawanî 10 serrî binê tedaya rejîmê Esadî û menfateanê hêzanê mîyanneteweyîyan de dej ant. Bi taybetî hêzanê demokratîkan ê Rojawanî, vera DAÎŞ’î û rejîmê Esadî cepheyêko xurt awan kerd. Rixmo ke rejîm şîyo haştîye nêameye. Sûrîye de ganî prosesê newera awankerdişî û haştîye dest pêbikero.”
