Dîyarbekir de bi pêşengîya Komeleya Verê Heme Çî Gedeyî, Kombîyayîşê ‘Newe ra Awankerdena Şaristanan bi gedeyan ra’ ame dest pêkerdene. Kombîyayîşî de ame dîyarkerdene ke ganî heqê ziwanê dayîke û heme heqê gedeyan bêrê pawitene.
Bi pêşengîya Komeleya Verê Heme Çî Gedeyî û beşdarbîyayîşê xeylî sazgehanê sîvîl ê şaristananê herême, Dîyarbekir de kombîyayîşê ‘Newe ra Awankerdena Şaristanan bi gedeyan ra’ ame organîzekerdene, ewro dest pêkerd. Kombîyayîş do 2 rojî dewam bikero. Kombîyayîşî de endamê sazgehanê gedeyan, sazgehê sîvîlî û xeylî kesî ca girewt. Endamê Komeleya Verê Her Çî Gedeyî Mazlum Mengûç, Serekê Daîreya Xizmetanê Komelkî yê Şaredarîya Amedî yê Şaristanê Girdî Omer Saman, endamê Merkezê Heqê Gedeyan ê FÎSA’yî û pawitoxa heqê gedeyan Ezgî Koman, psîkologe Hatîce Goz sey qiseykerdoxî beşdarê kombîyayîşî bîyî.
‘Seba pawitena ziwanî xoverdayene’
Destpêkerdişê kombîyayîşî de Sereka Komeleya Verê Heme Çî Gedeyî Rezan Kaya qisey kerd. Rezan Kaya bale ante muhîmîya ziwanî ser û derheqê qiseykerdena ziwanê dayîke ya gedeyan reyde wina vat: “Gede, pêroyî bi ziwanê xo yê dayêke embazanê xo reyde kay kenê. Hîkayeyê ke gedeyan rê yenê vatene, ziwanê dayîke de yê. Gedeyê ke ziwanê dayîke nêzanê asîmîle benê. Ziwano ke gedeyê pê girdi benê, pê cuyenê û pê hîsanê xo vanê ziwan o. Ziwan, seba averşîyayîşê psîkolojîya gedeyan zî xeylî muhîm o. Demo ke gedeyê bi ziwanê dayîke girdi nêbê, bi ziwanê dayîke hîsanê xo nêvajê, no bandorêko negatîf cuya gedeyan ser o keno. Coka ganî ma heme seba pawitena û averberdena ziwanê dayîke xover bidê.”
Rapor û xebatê ke gedeyan ser o bîyî, ameyê vilakerdene
Badê qiseykerdişê Rezan Kaya, Mazlum Mengûçî “Raporê xebatanê warî yê binpaykerdena heqê gedeyan ê 5 şaristananê herêmê erdlerzî” peşkeş kerd, Omer Saman zî “Xebatanê Şaredarîya Amedî yê Şaristanê Girdî yê gedeyan ser o” vila kerd. Badê qiseykerdişê Omer Samanî mabênêko kilm ame dayene. Dima ra Ezgî Koman babeta “Tirkîye de hetê heq û azadîya gedeyan ra sistbîyayena berpirsîyarîya pêroyî” û Hatîce Goz zî babeta “Cuya rojane de heqê gedeyan rê ewnîyayîş” ser o qisey kerd.
Kombîyayîş bi roniştişo 2. dewam kerd.
