Qezaya Giyadînî ya Agirî de bi munasebetê 15ê Gulane Roşanê Ziwanê Kurdkî şayîya dengbejan ameye viraştene. Şayî de parlamentera Dem Partî Nejla Demîr qisey kerd û vat: “Hêrişê dewlete yê serê ziwan û kulturê ma dewam kenê.”
Qezaya Giyadînî ya Agirî de bi munasebatê 15ê Gulane Roşanê Ziwanê Kurdkî şayîya dengbejîye ame viraştene. Şayîya ke hetê Komela Cigêrayîş û Averberdişê Ziwan û Kulturê Araratî (KURDÎ-ZAN) û Şaredarîya Giyadînî ra ame organîzekerdene, Parlamentera DEM Partî ya Agirî Nejla Demîr, temsîlkarê sazgehanê sivîl û xeylê welatî beşdar bîyê. Şayî Salona Mudirîyetê Karanê Kulturî û Komelî yê Şaredarîya Giyadînî ameye viraştene û pankarto ke ser o “Ziwanê ma rûmetê ma yo” nusîyabî ame aliqnayene.
‘Ganî ziwanê Kurdkî her ca de azad bo’
Hemsereka KURDÎ-ZAN’î Dîcle Bozkurt şayî de qisey kerd û 15ê Gulane Roşanê Ziwanê Kurdkî şarê kurdî rê pîroz kerd û vat: “Tena waştişê ma o yo ke ziwanê Kurdkî her ca de bi hawayêko azad bêro şuxulnayene. Ganî perwerdeyê Kurdkî keye ra dest pê bikero û her kes gedeyanê xo reyde Kurdkî qisey bikero.”
‘Ziwanê Kurdkî mîyanê 8 ziwananê tewr zengînan de yo’
Dima ra parlamenter Nejla Demîr bale ant tedayanê ziwan Kurdkî û muhîmîya pawitişê ziwanê dayîke ser o û vat: “15ê Gulane Roşanê Ziwanê Kurdkî ma hemînan rê pîroz bo. Ziwanê Kurdkî ziwanêko qedîm û zengîn o; mîyanê ziwananê dinya de hetê xezîneya çekuyan de mîyanê 8 ziwananê tewr zengînan de yo . Ma hezar serrî yo seba ziwanê xo têkoşîn danê. Dewlete hema zî helwêstê xo yê verê cû domnena. Amancê dewlete o yo ke Kurdkî çin bikero û şarêkê nasnameyê ey ra qut bikero; çi heyf ke no nêzdîbîyayîş hema zî dewam keno.”
Kulturê dengbejîye û vîrê komelî
Şayî de dîwanê dengbêjan, deyîrê serê heskerdiş û qehremanîya kurdan ameyê vatene. Dengbêjan zî dîyar kerd ke ziwanê dayîke sebebê estbîyayîşê komelî yo û kulturê dengbejîye pawitişê vîrî de wayîrê rolêkî yê ciwîyayîşî yo.
Program hetê beşdaran ra bi eleqeyêko baş ame taqîbkerdene, şayî bi govende û çepikan qedîyaye.
