Nuştoxê Rojnameyê Yenî Yaşamî Dr. Hayrî Hazargolî, bal ant munaqeşayan ser o ke derheqê statuyê Rayberê Şarê Kurdî Abdullah Ocalanî de yenê kerdene û dîyar kerd ke eger îqtîdarê AKP’yî babeta statuyî de gamaêka zelale nêerzo, manayê nê no yo ke proses cemidîyayo. Hayrî Hazargolî eşkera kerd ke seba vîyartişê nê halî û zordarîya îqtîdarî zî ganî têkoşîn û çalakî qat bi qat bêrê pîlkerdiş.
Nuştoxê Rojnameyê Yenî Yaşamî Dr. Hayrî Hazargolî, derheqê munaqeşayanê statuyê Rayberê Şarê Kurdî Abdullah Ocalanî de hişyarî û erjnayîşê muhîmî kerdî. Nuşteyo ke bi sernameyê “Gelo no kayêko pîl ê vîndîkerdişê Tayyîp Erdoganî yo?” wina yo: “Şarê kurdî û hêzê demokrasîyî, seba ke statuyê Rayberê Şarê Kurdî dîyar bo qadî pîr kerdî. Şarê kurdî û hêzê demokrasîyî na babete de helwêstê xo bi hawayêko akerde û zelal mojna. Teberê nê helwêstê şarî de, eger AKP na babete de gamêk nêerzo, gumanê ‘xehilnayîşî’ do hîna zêde bibê.
Vatişê ‘Proses dewam keno’ cehdêkê aramkerdişî yo
Çira muxatabgirewtişê Rayberê Şarê Kurdî yo ke pratîk de beno, nêno fermîkerdiş? Her kes nê persî perseno. Eşkerayîya de ke 5ê gulane de nameyê Rayberîya Têgêrayîşî Apoyî ser o amebî dayene zî no çî amebi îfadekerdiş. Na babete de ke her kes perseno eke cewab nêrî dayene, Tayyîp Erdogan çi vajo zî kes bawer nêkeno. Vatişê Erdoganî yê ‘proses dewam keno’ do tena sey aramkerdişêk bêrê vînayene. Xora wina yeno vînayene.
Mumkin o ke Ewropa zî biba amûrê xejilnayîşî
Îqtîdarê AKP’yî bi zêdekerdişê yew-di odayanê zindanê Îmralîyî, waşt ke fikrêko winasîn bierzo orte ke seke rewşa Rayberê Şarê Kurdî de bedilîyayîşêk keno. Bi îhtîmalêko pîl wazenê bi nê çîyî Komîteya Wezîran a Konseya Ewropa ser o tesîr bikerê ke babeta ‘heqê hêvî’ de heta aşma Hezîrane wext dabi. Hema zî plananê xo yê sîyasîyan şuxulnenê û wazenê ke vernîya helweêstgirewtişê Yewîya Ewropa bigîrê. Ewropaya ke goreyê menfatanê sîyasîyan şina, mumkîn o ke reyna helwêstêka bêîstîqrar bîmojna. Mumkîn o ke Ewropa zî biba amûrê polîtîkaya xejilnayîşî ya AKP’yî. Labelê ne Abdullah Ocalan, ne şarê Kurd, ne hêzê demokrasîyî û ne zî Têgêrayîşê Azadîya Kurdan nê kayan nêwenê!
Qanûn û huqûq lazîm o
Mumkin o ke sazgeha îstîxbaratî ronayîşê têkîlîyan de rolêk kay kerdbo. Labelê rîpelê ewroyî de çîyo ke ke sazgeha îstîxbaratî bikera çin o. Nêeşkeno lez bido ronayîşê çekan o ke Erdogan qala ci keno. Teberê qanûn û huqûqî de, tu çîyêk nêeşkeno nê lezkerdişî bîyaro ca. Gama ewiline ya nê çîyî zî bi garantîkerdişê statûyê Rayberê Şarê Kurdî virazîyeno. Seba ke PKK’yî wexto ke xo fesih kerdbi, vatbi ‘Tena Rayberîya ma eşkeno nê prosesî rayra bero û biresno encam’. No rayraberdiş zî tenê eşkeno hetê muxatabêkî ra bibo ke statuyê ci dîyar o.
Eke gamî nêrî eştiş, no yeno manayê cemidîyayîşê prosesî
Dewlet Bahçelîyî hewteyo vîyarte vat, ‘wa problema statuyî çareser bo, koordînatorîya aştî û sîyasetî bêra awakerdene’. Dewlet Bahçelî vano rewşa ewroyî de tu averşîyayiş çinbo, labelê Serekkomar vano sazgeha îstîxbaratî seba lezkerdişê ronayîşê çekan xebatan kena. Nê çîyî, êdî seba nê prosesî çîyê wînasîn ê ke ganî nêrê qiseykerdene û vatene. Gelo do îqtîdar, helwêstêko ke şarê kurd û hêzanê demokrasîyî mojna, bigîro çiman ver? Yan do na rewşe bêra peygoşkerdene? Eger îqtîdarê AKP’yî nê helwêstê şarî ra pey, derheqê statuyî de gamêka zelale nêerzo, no yeno a mana ke no proses cemidaîyayo.
Do Tirkîya bifetesno
Çîyo tewr baş ke Tayyîp Erdogan zano o yo ke her tewir erjan bikero amûr. Yeno vînayene ke teberê domnayîşê îqtîdarê xo de, Tayyîp Erdogan welat û şarî xem nêkeno. Hemsencîyanê sîyasî yê teberî zî tenê seba nê çîyî şuxulneno. Labelê na reye babeta ke sey amûr şuxulneno, babetêka ke do hem îqtîdarê ey hem zî pêroyê Tirkîya bikero binê awe. Eke meseleyê kurdî bi nê tewrî sey amûr bêro şuxulnayene, do peynî de Erdogan hetê nê meseleyî ra derbêka winasîne biwero ke fekê ci akerde bimano!
