Deşta Erzinganî de mîyanê hêgayê de komêka karkeranê demserre rastê ma ameyî. Semsûr ra ameyê û hîna birîna erdlerzî weşîya înan de tezetîya xo ramena. Bi yew cumleye halê xo anê ziwan û vanê: “Halo ke ma tederîme kes pê nêzano.”
Bi wisar wextê karkeranê demserre dest keno ci. Deşta Erzinganî de mîyanê hêgayê de komêka karkeranê demserre rastê ma ameyî. Na koma ke Semsûr ra ama çawûşîya na kome Abbas Topal keno. Wisar ke ame Abbas Topal karkeraran kom keno û gorê kar û xebatî welat bi welat şonê. Hetanû payîz o peyên xebetînê û bado agêrenê Semsûr.
Nika Erzingan de hegayê Pincarîde xebetînê, wextê qeysîyan şonê Meletî, goreyê karî welat bi welat dima nona xo gêrenê. Çawûş Abbas Topalî rewşa karê xo ser ma rê qisey kerd.
‘Yewmîya ma senika, bese nêkeme weşîya xo biramnîme’
Abbas Topal xebatkarî û rewşa xo ser wina vano: “Ma weşîya xo Semsûr de ramneme. Semsûr de hard lerza, her cayê welatî bî xiravin. Ma ameyme Erzingan de karê hegayan de xebetînîme. Vaso yabanî yo ke mîyanê Pincarî de yo ey keme pak. Yewmîya ma senika, bese nêkeme weşîya xo biramnîme. Karê Erzinganî ke xeleşîya, tepîya some Meletî de karê qeysîyan de xebetînîme. Ayera dima some şaristanê Ordî de karê findiqan de xebetînîme. Waxto ke kar û gurê ma xeleşîya, peyser some welatê xo. Welatê ma de kar ke bî, îdare keme, çinê bî, hetanû wisar bêkar manenîme. Emser serdo ma mecbur çadirê de manenîme. Domanê ma serdan ver çinê bîyê.”
‘Çeyê xo poştîya xo de fetelnenîme’
Abbas Topal qiseykerdîşê xo wina domneno: “Ez Çavûşê karkerana. Lewê mi de des ponç karkerî est ê. Doman, cinik û camerdî pîya gurînîme. Yewmîya ma hezar û çarsey a. Sodir pesew ra urzeme, hatanû saete poncîne xebetînîme. Nonê xo ma bi xo anîme, kes marê non nêano. Germî ver de benîme perîşan.” Abbas Topal rindekîya koyanê Erzinganî ser zî wina vano: Koyê Erzinganî zaf rindekê, wareyê xo hîna binê vewre de yê. Ti ke tede bifetelîyê to rê rindekê. Ma yê ke tede gurîyenê ma rê giran yeno. yeno. Wisar waxte Pincarî yo, tepîya Amnonî waxtê Qeysîyan yeno, tepîya zî waxtê findiqan yeno. Semsûr de karê tutunî kenîme. Kare destîyo û girano. Hale ma sebeno heq zaneno.”
