Dayîşûgirewtişê mabenê Dewletanê Yewbîyayeyan ê Amerîka (DYA) û Komara Îslamî ya Îranî de kewtê qonaxêka nedîyar. Demêkî de ke yo pêvînayîşê dîplomatîkî, “xetanê sûr” ê her di hetan ver xetimîyayê, meydan de tehdîtê şerî yê her di hetan reyde, kaos û nedîyarîya Rojhelatê Mîyanênî dewam kena.
Mabenê Dewletanê Yewbîyayeyan ê Amerîka (DYA) û Komara Îslamî ya Îranî de demêk o cehdê dîplomatîk û muzakereyî bi mîyançîya weletanê sey Pakîstan, Uman û Qatar yenê caardene, kewtê qonaxêka nedîyar e. Prosesê ke seba sînorkerdişê programê nukleerî yê Îranî, wedarnayîşê ambargoyê ekonomîk û kêmkerdişê krîzî herême de amebi destpêkerdene, goreyê averşîyayîşanê peyênan xetimîyayê. Her di hetî zî bi eşkerayîyan û têgêrayîşanê xo nedîyarîya şerî yê Rojhelatê Mîyanênî domnenê.
Muzakereyan ra pêameyîş nêvejîya
Goreyê çimeyanê dîplomatîk û averşîyayîşanê meydanî de, DYA û Îran di nuqtayanê bingeyînan de pênêkenê. Serekê DYA Donald Trump dîyar keno ke hetanî Îran programê xo yê zengînkerdişê uranyumî nêdo vindarnayîş û paştîdayîşê xo yê leşkerî seba grûbanê çekdaran ê Sûrîye, Îraq, Yemen û Lubnanî nêbirno, tu averşîyayîş nêvirazîyeno. Sewbîna Trump, tehdîtê zêdekerdişê dorpêçê ekonomîk û reyna destpêkerdişê şerî tekrar kerd.
Îran tehdîtanê Trumpî sey blof vîneno
Vera nê çîyan, helwêstê Rayberîya Tehranî zî huşk o. Goreyê pisporan, Îran eşkerayîyanê Trumpî yê yewbînînêgirewtene, sey blof vîneno. Îran her peymane de ewilî waştişê wedaritişê heme ambargoyanê ekonomîk û bazirganîyanê xo ser o keno. Sewbîna Tehran qebul nêkeno ke destkarî û hêzê ey yê leşkerî yê herême muzakereyanê nukleerî de bibê babeta bazarîye. Rîyê nê nakokîyanê xorînan ra, vernîya dîplomasî xetimîyaya.
Şerê wekaletê yeno xurtkerdene
Xetimîyayîşê muzakereyan, tesîrê xo rasterast Rojhelatê Mîyanênî ser o kenê. Deryaya Sûre ra heta Îraq û Sûrîye, têgêrayîşê leşkerî yê her di hetan zêde benê. DYA bi zêdekerdişê hêzê xo yê leşkerî yê herême û xurtkerdişê kampanê leşkerî mesajê hedrekerdişê şerî dana. Îran zî bi rayîrê grûbanê xo yê wekaletî, DYA û mutefîkanê DYA tehdît keno. Çimeyê sîyasî hîşyarî danê ke na rewşa xetimîyaya de her tewir têgêrayîşê şaş ê leşkerî zî hêrîşêko provokatîf, pêroyê Rojhelatê Mîyanênî de eşkenê bibê sebebe teqnayîşêko gird.
