Rayberîya Têgêrayîşî bi eşkerayîyêka nuştekî veng da îqtîdarê AKP-MHP’yî ke wa bi berpirsîyarî nêzdîyê prosesî bibê, semedê çareserîyêka ke xeyrê ci reseno Tirkîya gamanê hewcedaran cade bierzê.
Rayberîya Têgêrayîşê derheqê prosesê Aştî û Komelê Demokratîkî de eşkerayîyêka nuştekî pare kerd û nê çîyî vatî:
“Rayber Apoyî 27ê sibata 2025î de bi Vengdayîşê Aştî û Komelê Demokratîkî vernîya çareserîya meseleya kurdan akerd. Yew roje badê nê vengdayîşî Têgêrayîşê Azadîye yê Kurdan adirbest îlan kerd. Mabênê 5-7ê gulane de kongreya xo ya 12. kerd û qerarê feskerdişê PKK’yî û qedênayîşê têkoşînê çekdarî girewt. Yew serre û nîm o ke qet pêkewtişêk nêbi. 26ê teşrîna peyên a 2025î de gerîlayê ke mîyanê sînoranê Tirkîya ra peyser ancîyayî eşkerayîye daye. 2 îdarekarê MÎT’î ameyî veradayene.Tay tunelê şerî ke teberê sînorê Tirkîya de yê ameyî vengkerdene. Wina îradeyê çekronayîşî eşkera ame mojnayene. Xora selahîyatdaranê dewlete zî vat vengdayîşê Rayber Apoyî ame caardene.
Gerek heqê hevî heta ewro biameyêne caardene
Rayber Apoyî vat prosesê aştîya negatîfî bi temam, êdî wextê vîyartişê prosesê aştîya pozîtîf o. Vat semedê nê gerek qanûnê azadîye bêrê vetene ke sîyaseto demokratîk bêro kerdene û demokrasîyo herêmî bigêrîyo binê temînatî. Hetê bînî ra şar û têgêrayîşê ma waşt wa statuyê Rayber Apoyî bêro dîyarkerdene û bibo azad ke bieşko prosesê aştîya pozîtîfî de rolê xo kay bikero. ‘Heqê hevî’ ke Devlet Bahçelîyî qalkerdişê xo yê verênî de ard ziwan, gerek heta ewro pratîk de biameyêne caardene.
Statu û muxatîyabîya Rayber Apoyî gerek bibê fermî
Netîceya munaqeşeyanê vîyartişê merhaleya 2. de 27ê adare de pêvînayîşê Îmrali de ame vatene ke dewlete do aşma nîsane de qanûnan hazir bikero. Semedê nê gerek Rayber Apo û têgêrayîşê ma reyde pêvînayîşî biameyêne kerdene. La qanûnî rojdem nêkewtî û nizdê 2 aşman o ke Rayber Apoyî reyde pêvînayîş nêbeno. Hem Rayber Apoyî rê tecrîd ame kerdene hem zî medyaya ke îqtîdarî ra nizdî ya bi propagandaya vera têgêrayîşê ma waşt komelî bixapîno. Vera nê ma 5ê gulane de eşkerayîye daye û vat dewlete cewabê gamanê ma nêdana. Na eşkerayîye de ame vatene ke semedê averşîyayîşê prosesî gerek statu û muxatabîya Rayber Apyî bi fermî bêrê qebulkerdene.
Selahîyatdaranê AKP’yî vera eşkerayîye tewir girewt
Roja ke na eşkerayî ameye dayene, Devlet Bahçeleyî qalkerdişê grûba partîya xo de eşkera vat statuyê Rayber Apoyî gerek sey ‘Koordîantorê Aştî û Sîyasîbîyayîşî’ bêro dîyarkerdene. Na eşkerayîya Devlet Bahçelîyî hetê DEM Partî, şarê kurdî û hêzanê demokrasî ra pozîtîf ameye vînayene. La hema roja verêne selahîyatdaranê AKP’yî bi vatişê statu çin o, mabênê Îramli û rêxistine de ronayîşê xete est o, vera eşkerayîye tewir girewt.
Xerîtaya rayîrê ke tesfîyekerdişî wazena
Gama ke şarê kurdî paweno ke Rayber Apo bibo azad,eşkerayîya Devlet Bahçelîyî ya 18ê gulane bi sebebê atmosferê negatîfî. Nê xerîtaya rayîrî de Rayber Apo, şar û Têgêrayîşê Azadîye rê bêhurmetîye ameye kerdene. Eşkerayîye de ame vatene ke Rayber Apoyî rê statu çîn o, halê mahkumîyetî do dewam bikero. Qet qala qanûnanê azadîye nêameye kerdene û ame vatene ke Rayber Apo endamê Têgêrayîşê Azadîye nêeşkenê sîyaset bikerê. Eşkerayîye de ge ge qala demokrasî bêro kerdene zî no têna sey sosê xerîtaya rayîrî ya ke çareserî ney, tasfîyekerdiş wazena, ame şuxulnayene. Xerîtaya rayîrî ya Baheçelîyî de yeno vatene ke Rayber Apo qet komelêkî temsîl nêkeno. No xora yeno manayê nasnêkerdişê kurdan û îradeyê ci yê sîyasîyî û nêwaştişê çareserkerdişê meseleya kurdan.
Qerarê vera CHP’yî hêrişê vera sîyasetê demokraîtkî yo
Herinda semedê çareserkerdişê meseleya kurdan a seserran de roldayîşê CHP’yî, mudaxaleyê vera ci mojneno ke waştişê înan yê çareserî çin o. Eke meseleya kurdan bingeyê demokratîkbîyayîşî de yena çareserkerdene gerek mudaxaleyêko winayên nêameyêne kerdene. Hem qala demokrasî kenê hem zî hêrişê sîyasetê azadî kenê.
Ma cehd kenê ke proses ser bikewo
Ma sey Têgêrayîşê Azadîye semedê serkewtişê prosesê Aştî û Komelê Demokraîtkî, çîyo ke kewno milê ma, ma do bîyarê ca. Semedê netîcegirewtişê prosesî gerek Rayber Apo û endamê Têgêrayîşê Azadîye bieşkê sîyasetê demokratîkî bikerê. Hem Rayberîye mahkum maneno hem zî prosesê Aştî û komelê demokratîkî ra netîce pawitiş! No yeno manaya famnêkerdişê karekterê prosesî.
Gerek qanûnê sîyasetê azadî yê Rayber Apoyî bêrê vetene
Nêzdê di serran o ke gerek semedê serkewtişê prosesî qanûnê azadîye biameyêne vetene ke Rayber Apo bieşko azad sîyaset bikero. Entegrasyono demkratîk ke merkezê sîyasetê demokratîkî de yo, tena wina beno. Wina meseleya kurdan yena çareserkerdene. Ma sey Rayberîya Têgêrayîşî venga îqtîdarê AKP-MHP’yî danê ke wa bi berpirsîyarî nêzdîyê prosesî bibê, semedê çareserîyêka ke xeyrê ci reseno Tirkîya gamanê hewcedaran cade bierzo.”
