Welatijanê Wanî bi ameyîşê Roşanê Qurbanî ser rewşa ekonomî erjna û dîyar kerd ke her çî zaf zehmet bîyo û vat: “Ma nêeşkenê çîyêke bigîrê, qîymetê pereyî nêmendo, ekonomî nêmendo. Hukmatî komel perîşan kerdo.”
Bi nêzdîbîyayîşî Roşanê Qurbanî ra sûk û kuçeyanê Wanî de liv û têgêrayîşêk zêde est o. Her ca de dezgeyê cil û bergan, şekir û gida ameyê ronayene. Liv û têgêrayîş, qelebalîx zêde yo la dayîş-girewtiş kêmî yo. Semedê ekonomîyê xirabî û bêkarîya şarî, roşanî bêmoral û zerrîşikite pêşwazî kenê. Welatijanê Wanî bale ante serê krîzê ekonomî, dîyar kerd ke ey nêeşkenê îhtîyacê xo sey serranê verê temîn bikerê û hewceyî înan goreyê serran ê verênan des qatî zêde vayîye virazîya ya.
‘Hukmatî komel pêrîşan kerdo’
Welatij Recep Cengizî behsê berzbîyayîşê enflasyonî û bêqîymetê erjê pereyan kerd û vat: “Ma nêeşkenê çîyêke bigîrê, qîymetê pereyî nêmendo, ekonomî nêmendo. Kamî îqtîdar girewto destê xo dizdîye kerda.” Recep Cengizî Hukmatê AKP’î rexne kerd û wina vat: “Hukmatî her ca de merdimê xo girewtê kar, xezîna dewlete de pereyî nêmendê. Ciwanî heme bêkar mendê û bîyê tiryakkêş. Hukmatî komel pêrîşan kerdo, ma qet hukmatî ra razî nîyê.”
‘Ganî qedexeyê serê dewan bêrê hewanayene’
Welatij Mehmet Tuganî zî dîyar kerd ke roşanê verê nikayinan ra başêrî bî û qiseykerdişê xo wina domna: “Rewşa ekonomî verê nika ra başêrî bî. Şarî hewceyê xo hîna rehet dîyêne. Nika şarî zafane koçê şaristanan kerdo, bêkarî zêde bîya, rewşa ekonomî baş nîya.”
Mehmet Tuganî bale ante serê qedexeyanê dewan û zozanan û waşt ke hukmat qedexeyan ê serê dewan hewano ke şar bieşko agêro dewanê xo û wina dewam kerd: “Ma wazenê ke astengî bêrê hewanayene. Şar agêro war û dewanê xo bieşko heywanan weybikero.”
‘Roşanê verê û yê nika têra zaf cîyayê’
Welatij Sumeyye Tîmûre bale ante serê vurîyayîşanê roşanî û wereyê xo bi roşananê serran verênan arde. Sumeyye Tîmûre dîyar kerd ke verê roşanan de şarî yewbînî zîyaret kerdêne, roşanî verê weşêrî bî û wina vat: “Verê merdimî bibî, şîyayîş û ameyîş bîbî, taybetî badê pandemî roşanê verênî endî nêmendî. Verê rîsipîyê û pîlê ma şîyene û ameyene, mîyanê komelî de bînê. Ey zî endî nêşinê û nêyenê. Werd û şimitiş bibî. Nika çîyêk nêmendo.
Rewşa ekonomî zî xirab a, no zî serê roşanan de tesîro negatîf keno. Kes nêeşkeno xo rê cilan, solan û şekirê roşanî bigîro.”
Welatij Alper Ertanî zî da zanayene ke vayîya her çî zaf zêdeyo û kes nêeşkeno îhtîyacê xo temîn bikero û vat: “dayîş û girewtiş zaf zehmet bîyo, şarî hetê pere çin o”
