Muzekkereyê mabênê DYA û rejîmê Îranî de eşkerayîyê huşkî ê her di hetan dewam kenê; la warê mîyanneteweyî de tehdîdê Trumpî û cewabê Îranî zî sey blof yenê erjnayene. Goreyê erjnayîşê pisporanê dîplomasîye, bêstratejîbîyayîşî Trumpî ra tehdîdê bêtesîr manenê û her roja ke şina Îran biavantaj beno.
Muzekkereyê nerasterast ê mabênê Dewletê Yewbîyayeyî yê Amerîka (DYA) û rejîmê Îranî de yê dewam kenê; la eşkerayîyê ke her di hetan ra yenê, danê mojnayene ke bazarî û muzakerê madeyê krîtîkan de xetimîyayê. Hefteyêk vere cû ama eşkerakerdene ke DYA û Îran pêameyê û do peymane bêro eşkerakerdene.
Trump: Yan peymanêka newe yan zî netîceyêka giran
Serêkê DYA’yî Donald Trump, şewa bîne eşkerayîya xo de bi ziwanêko huşk rejîmê Îranî tehdît kerd. Trumpî ke newe ra polîtîkaya xo yê ‘zexto giran’ kerdo dewre, îfade kerd ke o do qetî nêverdo Îran bibo wayîrî çekê nukleerî. Trumpî qiseyê xo de wina vat: “Rayberîya Tehranî ganî raştîya newe ya dinya bivîno. Yan Îran do şertanê ma yê seba peymanêka newe û hîra qebûl bikerê, yan zî do netîceyanê giranan reyde rîbirî bimanê. Ma paweyê peymanêke yê ke peynîyê fînansekerdişê grûbanê wekîl ê Rojhelatê Mîyanênî bîyaro.”
Pentagon: Heme opsîyonî masa de yê
Heto bîn ra, Wezîfedarê Wezaretê Karanê Teberî û Wezaretê Pawitenê (Pentagon) yê DYA’yî zî eşkerayîya xo yê çapemenîye de paştî da helwestê Trumpî û vat: “Seba vurîyayîşê helwesta Îranî, heme opsîyonî dîplomatîk û leşkerî masa de yê.” La hem tehdîdê Trumpî û hem zî eşkerayîyê Pentagonî nezelalî û bêstratejîya Trumpî ver êdî sey blofî yenê erjnayîş.
Rejîmê Îranî: Ma paweyê hêrişêk newe yê DYA’yî nîyê
Vera nê tehdîdanê rayberîya Washîngtonî, rejîmê Îranî zî eşkerayîyêka huşke da. Verfekê Wezaretê Karanê Teberî yê Îranî û wezîfedarê payeberzî kombîyayîşêk çapemenîye de îfade kerd ke muzakereyê binê tehdîdan de nêyenê qebûlkerdene. Wezîfedarê Îranî wina vat: “DYA bi ziwanêko zext û tehdîdê wazeno ma teslîm bigîro. La heta ke heme dorpêç û ambargoyê ekonomîk yê bê qanûnî nêrê hewanayene, ma do tu peymanêka newe îmza nêkerê. Ma heqênê xo yê meşrû û programê pawitişê welatê xo ser o tu kesî reyde bazarî nêkenê.”
Sewbîna wezîfedarê leşkerî yê Îranî îdia kerd ke vera hêrişêk newe yê DYA’yî hîşyarî da û vat: “Eke hêzê DYA’yî yan zî Îsraîlî herême de hêrişê menfîetanê înan bikerê, ey do bi heme hêzê xo cewab bide înan.”
