Wezîrê Hêzanê Deryayî yê DYA John Phelan bi qerarêke nişka ve ra wezîfeyê xo ra fek verada. Derheqê sebebê Phelan de agahîyêka zelale nêameye dayene la îstîfaya ey sey netîceyêka şerê DYA û Îranî ameye erjnayene.
Rayedarê sîvîl ê tewr payeberz ê Hêzanê Deryayî yê Dewletanê Yewbîyayeyan ê Amerîka (DYA) John Phelan, bi qerarêke nişka ve ra wezîfeyê xo ra îstîfa kerd. Verfekê Pentagonî Sean Parnellî hesabê xo yê Xî ser o eşkerayîyêk daye û dîyar kerd ke Phelan wezîfe ra aqitîyayo û do hetkarê ey Hung Cao bi wekalet nê wezîfî rayra bero. Derheqê sebebê dûrvistişî de tu mane nêame eşkerakerdene.
Wextê şerê Îranî de pêlê tasfîyeyî
No aqitnayîşo nişka ve ra, sey xeleka peyêne ya lîsteya derge ya tasfîyeyan pentagon de yeno vînayene. Badê ke Donald Trump çeleyê 2025î de reyna derbasî Qesra Sipî bi, xeylê rayedarê payeberz ê leşkerî zî wezîfe ra ameyê girewtene yan zî bêçare mendê ke îstîfa bikerê. No prosesê vurîyayîşî û wexto ke krîtîk de ke DYA vera Îranî mîyanê şerî de ya bale anceno.
Xeylê generalî wezîfe ra ameyê girewtene
Destpêkê na aşma de Fermandarê Hêzanê Bejayî yê DYA Randy George zî bê eşkeranêkerdişê tu maneyêkî wezîfe ra amebi dûrvistene. Bi eynî hewayî general Davîd Hodne û William Green Jr. zî karî ra ameybî girewtene.
Trump demêko qilm de badê ke ame serê karî, Serekê Fermandarîya Pêroyî Charles Q. Browm o ke wextê Joe Biden de amebî wezîfedarkerdene, ey zî wezîfe ra girewtbi.
Nê pêlê dûrvistişî tena mîyanê Hêzanê Bejî de nîyo, sewbîna xeylê sazgehê krîtîkî yê sey Hêzanê Deryayî, Emnîyetê Qeraxan, Ajansê Emnîyetê Neteweyî (NASA) û Hêzanê Hewayî de zî virazîya û xeylê rayberê payeberzî wezîfe ra ameyê dûrvistene.
