Serekê DYA Donald Trumpî eşkera kerd ke beno ke dayîşûgirewtişê Îranî reyde heta peynîya nê hewteyî biencam bibê. Kongreya DYA zî vera şerî qerarêko nederbasdar vet.
Serekê Dewletanê Yewbîyayeyan yê Amerîka (DYA) Donald Trump Ofîsê Ovalî de qisey kerd. Trumpî vat ke dayîşûgirewtişê Îranî reyde bi hawayêko pozîtîf aver şonê û beno ke o peynîya nê hewteyî de pêkerdişêk bibo. Trumpî dîyar kerd ke prosesê pêvînayîşî weş şono labelê hema encamêko dîyar çin o.
Rixmo ke bi aşman prosesê dayîşûgirewtişê mabênê Washîngton û Tehranî de dewam kerdê zî, her di hetan hema babetanê esasî ser o pênêkerdo.
Meclîsê temsîlkaran de qerarê vera şerî vejîya
Meclîsê Temsîlkaran ê DYA qerarêkê ke waştişê qedênayîşê operasyonanê leşkerî yê vera Îranî keno, vet. Labelê rîyê hêzê vetoyî yê Serekîye ra, no qerar nederbasdar aseno.
Raydayîşî de ke terefê çar temsîlkaranê Komarperweran ra ame desttekdayene, nêrazîbîyayîşo pîl vera polîtîkayên şerî vejîya orte. Ame dîyarkerdene ke bi taybetî vayîya enerjîyî yê ke zêde benê, hukmatî ser o tedayî gird keno.
Tehran ra hişyarîya şerî
Wezîrê Karanê Teberî yê Îranî Abbas Arakçî, televîzyona El Meyadîn a Lubnanî ra vat ke dayîşûgirewtişan de hema averşîyayîşêko şênber nêbîyo.
Rayberîya Tehranî reyna hişyarî daye ke eke Îsraîl hêrişanê xo yê vera Lubnanî hîra bikero, beno ke şerêko pîl reyna herême de dest pêbikero.
Lubnan de adirbesto nêmcet
Mîyanê Îsraîl û Lubnanî de awankerdişê adirbestêkêser o pêkerdişêk ame eşkerakerdiş. Hetan pêkerd ke tay cayanê pîlot binê kontrolê artêşa Lubnanî de awan bikerê.
Labelê, caardişê na peymane şertê vindarnayîşê hêrişanê Hîzbullahî reyde girêdaye yo. Labelê Hîzbullahî pêvînayîşî red kerd û da zanayene ke ê do hêrişanê xo yê vera hedefanê Îsraîlî bidomnê.
Trump vano ke ganî problemê Lubnanî yê Îranî ra cîya bêro erjnayene, labelê Tehran zî dîyar keno ke her di problemî yewbînan reyde girêdaye yê.
Nakokîya problemê nukleerî ser o
Babetanê tewr muhîman ê pêvînayîşan zî depoyê uranyumî yê zengînkerde yê Îranî yê.
DYA û Îsraîl îdia kenê ke Îran cehd keno ke çekanê nukleerî aver bero, labelê Tehran nê îdiayan red keno.
Wezîrê Karanê Teberî yê DYA Marco Rubîo, derheqê babete de eşkera kerd ke Îranî hema waştişê Washîngtonî qebul nêkerdî.
Neqebî de kaos zêde beno
Hêrişanê peyên ê dormeyê Neqebê Hurmizî de, adirbesto ke 8ê nîsane de kewt merîyetê keno tengane. Rîyê zêdebîyayîşê kaosê herêmê de, vayîyapetrolî reyna berz bîyî.
Kuweytî Îran bi hêrişê vera teyaregehê xo sucdar kerd. Labelê Îranî îdia kerd ke înan dayo hedefanê leşkerî ro, teyaregehî nê.
Rayedaranê Kuweytî dîyar kerd ke welat bi 13 fuzeyanê balîstîk û 17 dronan ameyo hedefgîrewtene.
Eşkerayîya Xamaneyî
Trumpî vat ke o wazeno Mucteba Xameneyî reyde bêro têhet ke sey rayberê dînî yê Îranî yena hesibnaye.
Yeno pawitiş ke Mucetaba Xameneyî yadkerdişê serrgêra mergê awankerdoxê Komara Îslamî ya Îranî Ruhullah Xameynî de eşkerayîyêk bido.
