DYA: Ma başûrê Îranî de vera nuqtaya fuzeyan û botanê mayin-ronayene hêriş kerd.
Cengê mabênê DYA-Îsraîl û Îranî yo ke 28ê sibate de dest pêkerdbi, roja xo ya 40. de bi pêkerdişê adirbestî ca dabî fersendanê dîplomatîkan ê seba çareserîyêke. La nika reyna xebera hêrişê neweyî ameyî.
Eşkerarayîya DYA’yî de ame vatene ke vera başûrê Îranî hêrişê neweyî ameyê viraştene. Serekîya Quwetanê Merkezî ya DYA (CENTCOM) da zanayene ke nê hêrişan de nuqtayê fuzeyan ê Îranî û botê ke yenê vatene ke wazenê mayinan ronê, ameyê pirodayene.
Eşkerayîya CENTCOMî de ame vatene ke nê hêrişî çarçeweya “pawitişo meşrû” de virazîyayê û armanc zî pawitişê eskeranê DYA yo ke vera tehdîdanê quwetanê Îranî de yê. Qiseykerdoxê CENTCOM’î Serwan Tim Hawkinsî vat ke artêşa DYA prosesê agirbestî yo ke Îranî reyde yeno ramitene ser “bi îtîdalîye dewam keno.”
Serebûtê nê hêrişan sero Îranî hîna eşkerayîyêka resmî nêkerda.
Rayberanê DYA’yî da zanayene ke nê hêrişî dormeyê Bandar Abbasî yo ke nêzdîyê Neqebê Hurmuzî de yo virazîyayê. Na mintiqa wayîrê baregehê çekanê giranan ê donanmaya Îranî ya. Medyaya dewlete ya Îranî zî da zanayene ke dima nê teqayîşan ra rayberanê dewleta Îranî dormeyê Bender Abbasî de dest bi cigêrayîşan kerd.
