MKGyî eşkera kerd ke muracatê Xelatanê Rojnamegerîya Cinîyan ê Gurbetellî Ersoz ê 2. dest pêkenê. Muracatî do mabenê 8ê hezîrane û 25ê êlule de bêrê kerdene.
Muracatê Xelatanê Rojnamegerîya Cinîyan ê Gurbetellî Ersoz ê 2. ke hetê Komela Rojnamegeranê Cinîyan ê Mezopotamya (MKG) ra yena organîzkerdene, dest pêkenê. Muracat do mabenê 8ê hezîrane û 25ê êlule de bêrê kerdene.
MKGyî hesabanê xo yê medya dîjîtale ser o seba muracatan veng da û wina vat: “Ma venga cinîyan danê ke şahîdê demî yê. Muracatê Xelatanê Rojnamegerîya Cinîyan ê Gurbetellî Ersoz dest pêkenê ke zereyê xo de heqîqetê neqişnayo. Muracatî do mabenê 8ê hezîrane û 25ê êlule de bêrê kerdene.”
Cuya Gurbetellî Ersoz
Gurbetellî Ersoz serra 1965î de dewa Ziverî de maya xo ra bîya ke girêdayeyê qezaya Palû ya Xarpêtî ya. Gurbetellî Ersoz wendegeho verên dewa xo de wend, wendegeho mîyanên Edene de wend. Badê beşê Kîmya yê Unîversîteya Çukurovayî ra mezun bîya û masterê xo warê “Dorûver û Enerjî” ser qedêna û sey hetkara kîmyager xebitîyaya. Aye serra 1993î de rojnameyê Ozgur Gundemî de dest bi xebatanê rojnamegerîye kerd û demêko kilm de bîye mudurî rojnameyî. Gurbetellî Ersoz cinîya yewin a ke Tirkîya de sey Mudura Pêroyî ya Weşanî xebitîyaya.
Gurbetellî Ersoz 8ê teşrîna verêne 1997î de Başûrê Kurdîstanî de şerêk de cuya xo ra bîye. 7ê teşrîna verêne de sey “Roja Rojnamegeranê Cinîyan ê Kurdî” yena vîrardene û bîya sembolö rojnamegerîya cinîyan. Aye bi vindertişê xo yo cesur Çapemenîya Azade de pêşengîya medyaya Kurdkî kerd.
