Karkerê madenî seba heqdestê xo vernîya Yildizlar Holdîngî de reyna dest bi çalakî kerd.
Karkerê madenî yê girêdayeyî Sendîkaya Xoser a Karkeranê Madenî yê ke şîrketê madenî yê bi nameyê Dorukî de xebitîyenê seba heqdestê xo Anqara de dest bi grevê vêşanîye kerdbi û dimayê sozanê kehetê wezaretanî ra amebi dayene çalakîya xo qedînaybî. La rixmê sozanê ke ameybî dayene zî karkeran nêşına heqdestê xo bigîrê. Ney ser o karkeran reyna dest bi çalakî kerd. Karkerî vernîya Yildizlar Holdîngî yê qezaya Çankaya ya Anqara de ameyê têhet.
‘Ma do heta peynî paştî bidê karkeran’
Sezaî Temellîyî çalakî de qisey kerd û îfade kerd ke ê do heta peynî piştgirîya karkeran bikerê û wina vat: “Veng û têkoşînê karkeran madenî bîyo vengê heme karkeranê madenî ke heqê înan yeno werdiş. No welat bîyê cehenemê karkeran Heqê karkeran yeno werdiş her tim mîyanê şert û mercanê xiraban de yê. La seba sermayedaran nê welatî kerdo cinet.”
‘Sozê ke ameyê dayene nêardê ca’
Ozgur Ozelî ard vîr ke hetê 3 wezaretan ra karkeran rê soz amebi dayene ke do heqdestê xo bigîrê û nê çîyî vatê: “Vatişê karkeran heqdestê xo girewto rast nîyê. Destheqê karkeran nêameyo dayene û sozê ke ameyê dayene zî nêardê ca. Erdogan 1ê gulane de vat ‘Ma heqdestê karkran dayo’ la çîyêko winasîn çin o. Ma veng danê raya pêroyî ke paştî bidê karkeran.”
Sewbîna karkeranê madenî zî dîyar kerd ke heta ê heqdestê xo nêgîrê do çalakîya xo bıdomnê.
Avûkatê karkeran Mursel Underî zî îfade kerd ke dimayê çalakîya karkeran ewro heqdestê karkeran dayo û ê do bihûmarê ka pêro dayo yan nê. Mursel Underî vat ke 85 mîlyon TL ameyo dayene û 15 mîlyon zî do ewro bêrê dayene û dîyar kerd ke ê Wezîrê Karanê Zereyî reyde têkilî de yê.
