Karkerê madenî yê ke seba heqdestê xo 8 rojî yo grevê veşanîye de yê, rixmê dorpêçê polîsan zî çalakîya xo domnenê.
Karkerê madenî yê ke girêdayeyê Sendîkaya Xoser a Karkeranê Madenî yê û şîrketê madenî yê bi nameyê Dorukî de xebitîyenê, seba heqdestê xo dest bi grevê veşanîye kerdbi; 8 rojî yo Parka Kurtuluşî ya qezaya Çankaya ya Anqara de çalakîya xo domnenê. Serekê Pêroyî yê Partîya Karkeranê Tirkîya (TÎP) Erkan Baş zî karkeran reyde kewt grevê veşanîye û înan reyde çalakî de yo. Roja 8. ya çalakî de karkeranê madenî plan kerd ke ver bi Wezaretê Enerjî rayîrşîyayîşêk organîze bikerê. Labelê saetanê serê sibayî de dormeyê karkeran hetê polîsan ra ame dorpêçkerdene. Karkerî binê dorpêçî de çalakîya xo domnenê.
Karkerî vera dorpêçî zî bi vatişê sloganan çalakîya xo domnenê û nêrazîbîyayîşê xo vera dorpêçî mojnenê. Sendîka, sazgeh û partîyê sîyasî yê ke seba paştîdayîşî yenê zîyaretê karkeran, hetê polîsan ra yenê astengkerdene û nêverdanê ke ê şirê karkeran het.
Goreyê planê karkeran, ganî saete 12:00î de ver bi Wezaretê Enerjî rayra bişîyêne, labelê rîyê dorpêçî ra destûr nêame dayene û karkerî cayê xo de çalakîya xo domnenê.
