Endama Konseya Serekîye ya Pêroyî ya KCK’yî Sozdar Avesta vat, “Eke seba çareserîya meseleya Rayberîye muxatap genê, o wext wa goreyê ci nizdî bibê. Bi taktîkanê dergkerdişê prosesî ne proses aver şino ne zî meseleya 100 serran çareser bena.”
Endama Konseya Serekîye ya Pêroyî ya KCK’yî Sozdar Avesta programêkê taybetî yê Stêrk TVyî de rojdem erjna. Avesta ard ziwan ke Prosesê Haştîye û Komelê Demokratîkî yo 27ê sibata 2025î ra nata yena rayraberdene seba ke hukmatî gamê ke hewce kenê nêeştî kewt tengahî. Avesta birnayîş pêvînayîşanê bi Rayber Apoyî şermezar kerdî û vat seba ke proses bêro averberdene gerek statuyê Rayber Apoyî bêro naskerdene, serûberkerdişê qanûnî bêrê kerdene û azadîya ci ya fîzîke bêro caardene.
Avesta pêvînayîşê 24ê gulane pozîtîf erjna û vat la no têna xoser qîm nêkeno. Avesta ard ziwan ke raporê 7 madeyan ke medya de yeno qiseykerdene nêresayo înan û vat eke mesajêko fermî bêro ê do nê bierjnê. Avesta îdade kerd ke seba ke prosesî ra bêro bawerkerdene gerek têna eşkerîye nêrê dayene, gamê pêtî yê qanênî û sîyasîyî bêrê eştene.
Avesta ard ziwan ke proses hem prosesê têkoşînî û hem zî prosesê muzakereyî yo û veng da şarê kurdî û hetanê demokratîkan ê Tirkîya ke wayîrê prosesî bivejê. Avesta ard ziwan ke mesele têna bi rayîrê dîyalog û muzakereyî yena çareserkerdene û vat, “Çareserîya na mesele statuyê Rayber Apoyî ra dest pê kena. Eke seba çareserîya meseleya Rayberîye muxatap genê, o wext wa goreyê ci nizdî bibê. Bi taktîkanê dergkerdişê prosesî ne proses aver şino ne zî meseleya 100 serran çareser bena.”
Avesta caardişê vera CHP’yî zî erjnayî û vat hukmat hetêkî ra qala demokrasî û çareserîya meseleya kurdan keno, heto bînî ra zextê vera muxalefetî zêdîneno, no zirar dano prosesî.
Avastaya ke qala averşîyayîşanê herêmî kerd, vat Îran bi zextanê vera şarê kurdî û hetanê bînan ê komelkî nêeşkeno meseleyan çareser bikero û seba demokratîbîyayîşî veng da. Avesta vat eke hêrişê vera kurdan dewam bikerê, şar do heqê xo yê xopawitişî bişuxulno.
Derheqê qewimîyayîşanê Sûrîye de zî Avesta hukmatê demkî yê Sûrîye seba ke statuyê YPJyî nas nêkeno, şermezar kerd. Avesta ard ziwan ke hêzanê YPJ û QSD’yî têkoşînê vera DAÎŞ’î de rolo muhîm kay kerd û vat prosesê entegrasyonî yê Rojawanî gerek nêaçarîyo asîmîlasyonî. Avesta vat xeta azadîya cinîyan seba Şorişê Rojawanî xeta sûr a.
