Koordînatora Yewîya Cinîyanê Armenîyan Anahîd Kasabîyan dîyar kerd ke ganî hukmatê demkî YPJ’yî nas bikero û vat: “Na naskerdiş tena manayê naskerdişê sîyasî de nîyo, no rayîrê dîyalogî akeno ke beşdarîya herkesî şekildayîşê ameyoxî de garantî keno.”
Vengdayîşê piştîdayîşî yê ke dezgehê komelê sîvîlî û kesayetê heqanê merdiman seba Yewîneyanê Pawitişê Cinîyan (YPJ) kenê, dewam kenê. Reyna vengdayîşê seba naskerdişê rolê cinîyan ê pawitişê komelanê herêmî û xurtkerdişê înan ê herêmanê şerî de zî zêde beno.
Koordînatora Yewîya Cinîyanê Armenîyan Anahîd Kasabîyan, ewro yew mesajê piştîdayîşî yê YPJ’yî reyde weşana.
‘YPJ îfadeyê bedilîyayîşê zîhnîyetî ya’
Anahîd Kasabîyan dîyar kerd ke mendebîyayîş peynîya hîkaye nîyo, destpêkê ci yo û wina dewam kerd: “Her keso ke şerî ra ganî mendo, rasta zî şerî ra ganî nêmaneno. O, şerî zerrîya xo de sey seyêka derge, mîyanê detayanê vengê xo de, mîyanê bêvengîya xo de û mîyanê awirêkê ke nêmaneno aramîye, xo de hewîneno. Labelê reyna zî nûseno ke vîrardiş nêbê goristanê diyîn û dej bêmana nêmano. Mîyanê nê dîmenî de, tecrubeyê cinîyan vejîyayî orte ke waşt pozîsyonê qurbanîye bişiknê. Mîyanê nînan de Yewîneyê Pawitişê Cinîyan (YPJ) est o ke o tena formasyonêko leşkerî nêyo; o eynî wext de îfadeyê bedilîyayîşê xorîn ê zîhnîyet û rola cinîyan o. No mîyanê çarçewaya giran a şerî de awan bi ke uca de cinîyan xo vera di weçînîtîyan de dî: Yan binkewtiş yan zî rîbirîbîyayîş. Înan weçîna ke bibê parçeyê pawitişê komelî û yê xo.”
‘Estbîyayîşê înan tena leşkerî nîyo, wayîrê hetêkê sembolîk û komelkî yo’
Anahîd Kasabîyan dîyar kerd ke estbîyayîşê înan tena leşkerî nîyo; wayîrê hetêkê sembolîk û komelkî yo û wina dewam kerd: “Vînayîşê cinîyan mîyanê derûdorêkê de ke demêko derg înan sînordar kerdbi, reyna pênase kerd. No bedilîyayîş yew vengane de vejîya orte; o encamê arêkerdişê tecrubeyanê bindestîye û lazimtîya wayîrvejîyayîşê vengî û girewtişê qeraran de vejîya orte. Nê semedî ra peygoşkerdişê nê rolî tena înkarê qurbanîyan nîyo, eynî wext de peygoşkerdişê parçeyê bedilîyayîşî ke komelî bi xo dîyo.”
‘Hukmatê Sûrîye mecbur o ke nê tecrubeyan bi şeklêko raşt û berpirsîyar bivîno’
Anahîd Kasabîyan qiseykerdişê xo wina qedîna: “Ne semedî ra hukmatê Sûrîye mecbur o ke nê tecrubeyan bi şeklêko raşt û berpirsîyar bivîno û rolê cinîyan ê pawitiş û prosesanê komelkî de sey parçeyêko muhîm ê rastîya Sûrîyeyî qebul bikero.” Kasabîyan peynîya mesajê xo de wina vat: “No qebulkerdiş tena nêyeno manaya qebulkerdişê sîyasî; o eynî wext de wendişêko xurt ê rastîye yo. O rayîrê dîyalogêko hîrayêr akeno ke beşdarîya her kesî ya şekildayîşê ameyoxî de garantî bikero. Mîyanê rêzanê nê mîrasî de hîkayeyî ke hema nêqedîyayî est ê. Ê red kenê ke bêrê esterîyayene û îsrar kenê ke bêrê nûştene.”
