Hemsereka Pêroyî ya DBP’yî Çîgdem Kiliçgun Uçar kombîyayîşê ‘haştîya komelkî û azadîye’ de nêrazîbîyayîşê xo mojna ke dewlete tena wazena ke terefo bîn game bierzo.
Çarçewa ercnayîşanê pêvînayîşanê bi Rayberê PKK’î Abdullah Ocalan de Êlih de kombîyayîşê ‘haştîya komelkî û azadîye’ ame kerdene.
Hemsereka Pêroyî ya DBP’yî Çîgdem Kiliçgun Uçar kombîyayîş de qisey kerd. Çîgdeme îfade kerd ke her ca de kurdan xo rê nasnameyêko xoser awan kerdo û nasnameyê xo paweno.
Çîgdeme vat: “Ma wazenê ke nê qewimîyayîşanê peyênan şarê xo reyde bi qîmî nîqaş bikerê. Rojhelatê Mîyanênî de dîzaynêko newe yeno kerdene û no tesîrê Tirkîya zî keno. Sûrîye ra pêro hêzan xo peyde ant. Tena kurdî mendî. Şorişê Cinîyan ê Rojawanî pêro dinya de veng vet.:
Çareserîya meseleya kurdan yena qiseykerdene. Na çareserîye de Birêz Ocalan aktorêko pîl o Ganî Birêz Ocalan xo mîyanê komelî de bibo. Çareserîya meseleya kurdan seba haştîya welatî elzem a. Kurdan awankerdişê nê welatî de ked û îrade mojnayî. Coka ganî çin nêhesibîyê. Ganî wird hetî zî gaman bierzê. Dewlete û îqtîdar her çî terefê bînî ra wazenê. La seba çareserîye ganî dewlete game bierza. Girîng o ke ganî her kes wayîrê nê prosesê neweyî vejîyo.”
