Hemsereka Pêroyî ya DBP’yî Çîgdem Kiliçgun Ûçar Cizîr û Hezex de esnaf û şarî reyde ameye têhet. Çîgdem Kiliçgun Ûçar vat ke nê prosesî ra encamgîrewtiş do vernîya çareserkerdişê pêro probleman abiko.
Hemsereka Pêroyî ya Partîya Herêman a Demokratîkan (DBP) Çîgdem Kiliçgun Uçar û heyeto ke aye reyde yo, çarçewaya xebatanê “Ma vatişê aştî şarî reyde awan kenê” de, qezayanê Şirnexî Cizîr û Hezex de karker, esnaf û şarî reyde ameyî têhet. Çîgdem Kiliçgun Uçar qiseykerdişê xo de vat ke wexto ke Prosesê Aştî û Komelê Demokratîkî bireso encamêk, na yewe do vernîya çareserkerdişê pêro problemanê komelî abiko.
‘Problemo tewr esasî azadîya Ocalanî ya’
Çîgdem Kiliçgun Uçar serê sibayî tewr verî esnafanê Halê Cizîrî reyde ameye têhet û goş da esnafan ser o. Esnafan derheqê xebatanê pakîye yê şaredarîye û çinbîyayîşê halêkê neweyî de rexneyê xo kerdî. Esnafan derheqê Prosesê Aştî û Komelê Demokratîkî de zî vat ke problemê înan ê zereyî est ê û nê do bêrê çareserkerdene, labelê problemo tewr bîngeyîn azadîya şarê kurdî û Rayberê Şarê Kurdî Abdullah Ocalanî ya. Welatîyan tewr peyên veng da rayedaran ke girewteyê zindanan wa bêrê veradayene.
Dima Çîgdem Kiliçgun Uçar goş da esnafan ser o û dîyar kerd ke tayê sazgehê dewlete seba ke vernîya xebatanê şaredarîyanê înan bîgêrî, muracatê her tewir rayîran kenê.
‘Ma seba azadîya Ocalanî verê xo bidê qadanê mîtîngî
Çîgdem Kiliçgun Uçar dewamê qiseykerdişê xo de bal ant Prosesê Aştî û Komelê Demokratîkî ser o û wina qisey kerd: “Tirkiya de çîyê zaf muhîmî qewimîyayê. Derûdorê ke heta nika vatêne problem çin o, ewro derheqê çareserîya meseleyê kurdî de qisey kenî. Nê munaqeşayê ke prosesî ser o yenî kerdiş, seba cuyêka hempare û azade yê. Ma do 27-28ê na aşme de seba azadîya Rayberê Şarê Kurdî Abdullah Ocalanî mîtîngan organîze bikî û ma vanî wa pêro şarê ma seba vengê azadîya Ocalanî verê xo bido qadanê mîtîngî.”
Karkerî ameyê zîyaretkerdiş
Dima Çîgdem Kiliçgun Uçar û heyeto ke ay reyde yo verê xo da qezaya Hezexî û tîya de karkerê ke atolyeyanê tekstîlî de xebitîyenê, ê zîyaret kerdî û înan reyde mişewrîyaye. Çîgdem Kiliçgun Uçar asta ke proses resayo karkeran rê agahî dayî û waştiş kerd ke karkerî wayîrê nê prosesî vejîyî.
Zîyaretkerdişê bazarê şarî
Çîgdem Kiliçgun Uçar û heyeto ke aye reyde yo, bazarî de ke taxa Turgut Ozalî de ameyo ronayene şarî reyde ameyî têhet. Tîya de welatî û rotoxê bazarî, rîyê vaybîyayîşê xida û kel û pelî gazincê xo kerdî. Çîgdem Kiliçgun Uçar zî da zanayene ke wexto ke Prosesê Aştî û Komelê Demokratîkî bireso encamêk, do seba çareserîya pêro problemanê komelî rayîr abibo.
Çîgdem Kiliçgun Uçar û heyeto ke aye reyde yo do şand dewa Deşta Darê ya Hezexî û taxa Çemkûrkî ya Cizîrî de tewrê kombîyayîşanê şarî bibê.
