Hemsereka Pêroyî ya DEM Partî Tulay Hatîmogullari dîyar kerd ke pêvînayîşê peyênî yê bi Rayberê Şarê Kurdî Abdullah Ocalanî de seba prosesî rayîrêk nîyaya ro û vat: “Heyeta ma zî AKP reyde pêvînayîş kerd û waşt ke bilez çarçewaya qanûnî bêra viraştene. Verê ke Meclîs bikewo betlane ganî çarçewaya qanûnî bêrê viraştene.”
Hemsereka Pêroyî ya DEM Partî Tulay Hatîmogullari kombîyayîşê grûba partîya xo de Meclîs de qisey kerd. Tulay Hatîmogullari destpêkê qiseykerdişê xo de da zanayene ke vera hêrişanê serê elewîyanê Sûrîya de Ewropa de çalakîyî yenê viraştene û do şorê Neteweyanê Yewbîyayeyan zî û va ke ê sey DEM Partî paştî danê xebatanê vera hêrişanê serê welatijanê elewîyan. Tulay Hatîmogullari waşt ke hêrişê serê welatijanê elewîyan bêrê vindarnayene û waştişê elewîyan wina ard ziwan: “Ganî hêrişê serê Elewîyan bêrê vindarnayene. Ganî NY û qada mîyanneteweyî bikewê mîyanê hewildanan. Reyna Tirkîya û Şam mîyanê dîyalogî de yê. Ganî Tirkîya Şamî ra biwazo ke nê hêrişî bêrê vindarnayene. Ma vengdayîşê warê mîyanneteweyî kenê ke elewîyan rê wayîr vejîyê. Elewîyî êdî nêwazenê nê cografya de bi qirkerdişan re rî bi rî bimanê.”
Destsernayîşê heqê nefeqa nêyeno qebulkerdene
Tulay Hatîmogullari bale ante serê qerarê betalkerdişê heqê nefeqa û wina vat: “Nê qerarê netîceya beyanatanê nêzdîyê îqtîdarî yê vera nefeqa û provokasyonanê vera nefeqa de ameya girewtene. Na neyartîya vera cinîyan a. Yew wexto ke xizanîya cinîyan zêde bena û kişîyayîşê cinîyan hîna zaf benê de destsernayîşê heqê nefeqa nîno qebulkerdene. Eynî wextî de hêrişê vera destkewteyanê cinîyan o. Nika zî bi pakêta hukmî 12. heqê domanan binpay kenê û nêseypêyîya cînsî zî kûr kenê. Ma sey DEM Partî vanê; destkewteyê cinîyan nêbenê babeta bazarî û ma destê xo destkewteyanê xo ra nêancenê. Bi şiara ‘Jin jiyan azadî’ ma do têkoşînê cuye hîna pîl bikerê.”
‘Welatijî bi vêşanî ra rî bi rî yê’
Tulay Hatîmogullari dîyar kerd ke krîzê ekonomî her ke şino xorîn beno û wina qisey kerd: “Tayê merdimî sermayeyê xo pîl kenê û welatî zî bi vêşanîye re rî bi rî yê. Her roje 26 hezarî ra zafêrî dosyayê îcrayî şinê dezgeyanê berpirsîyaran. Nê reqamî nîşanê xizanî û vêşanîya welatijan a. Tirkîya enflasyonê werdî de numreye yewine de ya. Tirkîya ke welatê zîretî ya, cotkarî deyndar ê û nêşenê berhemanê xo biroşê. Ma tîya de persenê; welatîyê ke bi zîretî idareya xo kenê do se bikerê? Rewşêka xirabe esta. La ma vera na rewşe de sereyê xo nêfînenê verê xo.
Ma do xover bidê
Ma do rêxistina xo pîl bikerê û bi xoverdayîşî ma do heqanê xo bigîrê. Sey nimûne karkeranê madenî bi xoverdayîşî heqê xo bi dest vîstî.” ‘Ma do heta peynî têkoşînê aştî û demokrasî biramê’ Tulay Hatîmogullari dîyar kerd ke Tirkîya de krîzê huqûq û demokrasî zî kûr beno û nê çîyî ardî ziwan: “Ewro qerarê ‘Betalkerdişo qetî’ ya serê CHP’yî eynî wextî de dîzaynkerdişê sîyasetî yo. Wazenê îqtîdarê xo hîna biqewet bikerê û seba warê demokrasî dame danê ronayene. Ganî heme partî bi îradeyê xo îdareyê xo dîyar bikerê, ne ke bi destê hukmî. Vera nê caardişê antî-demokratîkan de ma venga heme kesanê ke demokrasî pawenê kenê ke têkoşînê hemparî hîna biqewet bikerê. Ma do heta peynî têkoşînê aştî û demokrasiyî biramê.”
‘Hewceyî bi qanûnanê demokrasî esta’
Tulay Hatîmogullari derheqê prosesê Aştî û Komelê Demokratîkî de zî va ke çarçewaya qanûnî temînatê prosesî yo û wina vat: “Gamê ke nêerzîyenê bawerîya hetan qels kenê. No proses bi hesabanê tengan nêşino ser, nêbeno ke bi nê hesabanê erjanan bêro sînorkerdene. No proses tarîxî û komelkî yo. Coka ganî na çarçewaya qanûnî bi şeklekê ke heme komelî bigîro mîyanê xo bêro pê ardene. Hewceyîya Tirkîya bi tengkerdişê heq û demokrasî nîyo, cayê aye de hewceyîya Tirkîya bi qanûnanê demokrasî esta.”
‘Ganî çarçewaya qanûnî bilez bêro amadekerdene’
Tulay Hatîmogullari vat ke ganî verê ke Meclîs bikewo betlane qanûnê hewceyî bêrê viraştene û nê erjnayîşî kerdî: “Pêvînayîşê peyênî de birêz Ocalanî rayîrêk newîye nîyabî ro. Heyeta ma zî AKP’yî reyde pêvînayîşêk kerd û waşt ke çarçewaya qanûnî bilez bêrê amadekerdene.
Ganî heta ke Meclîs nêro qefilnayene nê qanûnî bêrê viraştene. Gerek çarçewaya qanûnî zemînê demokrasiyî awan bikero û zemînê biratî û aştî biqewet bikero. Nê qanûnî gerek netîceyanê huqûqîyan xo reyde bîyarê. Badê ke çarçewaya qanûnî seba awankerdişê prosesî mekanîzmayê prosesî garantî bikerê, bêrê amadekerdene. Gama hîrêyine zî gerek qetî rol û mîsyona birêz Ocalanî bi qanûnan bêro garantîkerdene şertê ey bêrê vurnayene û başkerdene.
Seba nê zî berpirsîyarî ya îqtîdarî ya. Çinke seba ke no qanûn bêro viraştene ganî îqtîdar qebul bikero. Ganî îqtîdar berpirsîyarî bigîro xo ser û prosesê viraştişê qanûnan bido destpêkerdene. Çikas proses yeno dergkerdene, problemî zî hîna pîl benê.
Ma tu wext destê xo aştî ra nêantê
Ganî ma hîna zaf wayîrê aştî vejîyê û têkoşînê xo bihêz bikerê. Eke ma heme warê komelî de seba aştî vengêko hempar vejîyê, ma eşkenê bi îqtîdarî gaman bidê eştene. Ma do qetî tarîxê aştî binusnê. Qetî aştî do ser bikewo. Ma do aştî bîyarê. Ma soz danê ke seba nê ma do tu wext peyser game nêerzê.” Tulay Hatîmogullari peynîya qiseykerdişê xo de bale ante serê Konferansê Ravurîyayîşê Komara Demokratîke ke do 13-14ê hezîrane de Stenbol de bêra viraştene û vat: “Hetê roşnvîr, nuştox û kesanê sîyasîyan ra no konferans yeno viraştene. Ma seba ke aştî û demokrasî hîna biqewet bo, do têkoşînê xo biramê.”
