Mudirîya Xizmetanê Ciwan û Sporî ya Şaredarîya Peyasî û Komeleya Ma Seba Ameyoxî Tîya de yê (GÎB-DER) do ‘Têhetameyîşê Ciwanan ê Spor û Kulturî’ virazê.
Qeza Peyasî ya Amedî de, bi hemkarîya Mudirîya Xizmetanê Ciwan û Sporî ya Şaredarîya Peyasî û Komeleya Ma Seba Ameyoxî Tîya de yê (GÎB-DER) do ‘Têhetameyîşê Ciwanan ê Spor û Kulturî’ bêro viraştene.
No programêko spor, kultur, yewbîyayîş û cuya hempare ser o têhetameyîşê ciwanan amanc keno, do 12ê hezîranî de dest pê bikero û hîrê rojan dewam bikero. Têhetameyîş do Parka 75î ya qezaya Peyasî de mîyanê çadiranê ke ameyî ronayene de bêrê kerdene. Program de munaqeşeyanê jineolojî ra heta çalakîyanê sporî, atolyeyanê kulturî ra heta konseran, kayanê şarî ra heta atolyeyanê ekolojî, ciwanî do çalakîyanê cîya-cîyayan de bêrê pêser.
Seba tewrbîyayene vengdayîş
Rayedarê Mudirîya Xizmetanê Ciwan û Sporî ya Şaredarîya Peyasî dîyar kerd ke amanca înan ya bingeyînî bi veng, enerjî û hêvîya ciwanan ameyoxê azadî awan kerdene de ya. Rayedaran da zanayene ke ê wazenê bi na çalakîye yewbîyayîşî pîl bikerê û veng da heme ciwanan û şarê Amedî ke tewrê ‘Têhetameyîşê Peyasî’ bibê.
