Endamê Fermandarîya Merkezê Pawitişê Şarî Murat Karayilanî bi munasebetê Aşma Şehîdanê Fedayîyan mesajêko bivîdeo pare kerd û vat ke seba aştîya mîyanê şarê kurd û dewleta tirkan verê her çî ganî Rayberê Şarê Kurdî Abdullah Ocalan azad bo.
Endamê Fermandarîya Merkezê Pawitişê Şarî (MPŞ) Karayilanî vat ke aşma hezîrane Aşma Şehîdanê Fedayîyan a û wina dewam kerd: “8ê hezîrane fedayî Gulan, 17ê hezîrane fedayî Sema Yuce û 30ê hezîrane fedayî Zîlan resayî şehadetî. Vat ke fedayîtî, destpêkî ra nat mîyanê têgêrayîşî de ruhêko bingeyîn o. Eke vejîyayîşê Rayber Apoyî bingeyê famêkê fedayî ser o nêbîyêne, vejîyayîşêko wina mumkin nêbîyêne.”
Murat Karayilanî bi vîrardişê xoverdayoxanê Zindanê Amedî Mazlum Dogan, Ferhat Kurtay û hemrayanê ci, û badê ci çalakgeranê 14ê temmuze, vat ke fedayîtî û fedakarî her tim esasê têgêrayîşî bîyê.
Murat Karayilanî vat ke ewro her wextî ra zêdeyêr hewceyîya nê ruhî est a û wina domna: “Nika ma qonaxa peyêne de yê, qonaxa netîcegirewtişî de yê. Çiqas ke ma nê ruhî xurt bikerê, hende ma nêzdîyê serkewtişî benê.”
Murat Karayilanî vat ke seba çareserîya meseleya kurdan ganî zîhnîyetê her di hetan bivurîyo: “Ma vurîyayîş kerd, ma paradîgmaya çareserî de vurîyayîş viraşt. La dewlete hema zî bi zîhnîyetê înkar-îmha hareket kena. Bi nê zîhnîyetî çareserîya demokratîke nêbena. Ganî dewleta tirkan zî kurdan sey estbîyayîşêk nas bikera. Têkoşînê Rayber Apoyî yê Îmraliyî têkoşînêko neteweyî yo, seba heme kurdan o.”
Murat Karayilanî di nuqtayê bingeyinî tesbît kerdî:
‘Verê cû ganî Rayber Apo azad bo’
“No karêko xoser nîyo, qanûnêko bingeyin hewce keno. Verê her çîyî ganî statuyê Rayber Apoyî zelal bibo. Rayber Apo sermuzakerekerdox o, muxatabê yewin ê çareserîya meseleyê kurdî yo.”
‘Ganî estbîyayîşê şarê kurd qanûnî bibo’
“Seke bi vatişî qebul beno, ganî bi nuştişî zî bikewo qanûnê Komare. Nika şarê kurd qanûnan ra teber o, qanûnanê Tirkîya de kurd çin o.”
Murat Karayilanî vat ke eke nê her di bêrê caardene û bingeyê ney qanûnê entegrasyonê demokratîkî ser o seba gerîlayan bivejîyo, o wext proses do aver şêro: “Heta ke gamê qanûnî nêrê eştene, gerîlla çekan nêverdano. Herkes ganî na heqîqete bizano.”
Murat Karayilanî bale ante ke ganî teqez yewîya neteweyî bêra temînkerdene û stratejîyêka hempare ya kurdan biba, û seba ke Lozanêko dîyin nêbo, ganî bi tewirêko awarte nêzdî bibê: “Qederê şarê kurdî demê ameyoxî de do bibo eşkera. Ma behsê 4-5 rojan nêkenê; yew-di serrî, tewr zêde hîrê serran ra dima her çî do bibo eşkera.”
