Xidir Sezer o cîranê Alî Haydar Kaytanî weşîya xo dewa Hengirvan de ramita. 1994 de wexto ke dewlete dewa înan veşna û kerde tal, bar kerdo şîyo Mamekîye. Cîranê xo Alî Haydar Kaytanî ser qisey kerd û wina vat: “Alî Haydar Kaytan şarê xo rê zaf rind bî, merdim ke seba welatê xo şî heqîya xo cayê ey hardê welatî yo.”
Xidir Sezer dewijê Alî Haydar Kaytanî yo 1994 ra nat weşîya xo Mamekîye de rameno. Serre ra di rey şino dewa xo Hengirvan de mezele Pî û kalikê xo de çila veşneno. Xidir Sezerî domanîya xo de Alî Haydar Kaytan dîyo û derheqê ey û rewşa dewa xo ser ajansê ma rê qisey kerd.
‘Ez ameya page xo vînena’
Xidir Sezerî behsê cuya kamil, rayber û şorişgêro sozdar Alî Haydar Kaytanî kerd û vat: “Na dewa Alî Haydar Kaytanî ya. Serra 1938î ra dima şîye Pirre, dima ra şîyê Hakîs, Hakîs de hinî mendê. Û zara Zage de mendê, badê ra kî barkerdo şîye Hengirvan. Dewa înan 1970 de bîya tal. Na banê înan bi xo yo, destê bover de henîye xo bî, hegaye xo na cerde bî. Alî Haydar Kaytan merdimêko hewl bî, dormeyê xo pirr bî, hevalê ey zafî bî, o bi xo merdimêko kamil û şorişgêrêko zaf gird bî. Qomê xo pers kerdenê û şarê xo ra heskerdêne. Wendîşê xo yo verên Hakîs de wend, dima ra şî Mamekîye de wend. Uca ra tepîya seba wendişê xo şî Anqara. Merdim ke şî heqîya xo, cayê xo bê mezel nêbeno. Hardê xo ra dûr mendene rind nîyo. Ma ameyê dewa xo vînenême, şonê serê mezelî çila veşnenê. Mezelê kalik û pirîkê ma tîya de yê, page xo vînenême. Ez dewe de bîya pîl û bêrîya dewa xo kena, awa tîya şimita, nanê tîya mi werdo, serre ra di-hîrê rey ez yena dewe.”
‘Aştî wina nîna’
Xidir Sezerî qiseykerdîşê xo yo peyên de, prosesê Aştî ser wîna vano: “Aştî ke esta çi ra qeyûm erzene? Kam ke qisey kerd, kam ke venge xo kerd berz, kenê zere. Komel yeno peser eşkerayî danê, roje bîne gênê erzenê zere. Wina Aştî yena? Rojêke verg fetelîno raşte mîye yeno, ‘vano heqo ewro pîze mi beno mird. Mîye vergî ra vana ke, ez zana ke ti mi wenê. Mi rê yew lawike vaje dima ra mi bore. Verg çimê xo gêno, tepîya qaytê ci keno ke, mîye leyê xo de çin a. Mîye dote de vana ke, pîye to lawike vatêne, kalîke to lawike vatêne.
Înan ra pî û kalikanê ma tay behs nêkerd. Sey Riza, Qemer Agay û Hidir Agay tay behs nêkerd, sare ma 1938 de qir kerd. Waştêne ke şarê kirmancî welatê xo ra teber kerê.”
