Endama Têgêrayîşê Azadîye yê Kurdîstanî Hêlîn Umîte rojdem erjna û vat: “Eke senî ke Erdoganî vat proses yeno lezkerdene gerek statuyê sîyasî û huqûqî yê Rayber Apoyî bêro naskerdene, azadîya ci ya fîzîkî bêro caardene ke bieşko xebate rayra bêro.”
Endama Têgêrayîşê Azadîye yê Kurdîstanî Hêlîn Umîte programê taybetî yê televîzyonê Medya Haberî de rojdem erjna.
Hêlîn Umîte bale ante muhîmîya vengdayîşê ‘heqê hêvî’ yê 82 roşnvîran û zanistan ê wayîrê Xelata Nobelî ke semedê Rayber Apoyî ser û vat: “No vengdayîş semedê merdimîye zaf muhîm o. Warê şer û krîzî yê Rojhelatê Mîyanênî de şarê dinya yo wayîrê wîjdanî gêrayîşê çareserî de yo. No vengdayîş têna semedê heqê hêvî nêame kerdene, eynî wextî de semedê naskerdişê statuyê sîyasî û huqûqî yê Rayber Apoyî û caardişê azadîya ci ya fîzîke ame kerdene. Roşnvîrî zanê ke ke Rayber Apo merkezêkê çareserî yo.”
Umîte seba ke rixmê qerarê Mehkemeya Heqanê Merdiman a Ewropa nêşi Tirkîya ser, Komîteya Wezîran a Konseya Ewropa şermezar kerd û vat: “Ewropa bi tewirê xo yê vera meseleya kurdan verê înkar ê qirkerdişê vera kurdan akeno. Ewropa gerek raştîya Rojhelatê Mîyanênî ke ameye bedilnayene bivîno û polîtîkaya xo ya vera kurdan ra peyser game bierzo.”
Umîte ard ziwan ke rixmê poltîkaya înkar û îmhayî yê dewlete tirke ke bi serran ameyî domnayene, şarê kurdî estbîyayîşê xo pawit û vat: “Estbîyayîşê kurdan mezel de nêame tepiştene, mezel rijna. Serkêşîya PKK’yî de kurdan çar parçeyanê Kurdîstanî û her cayê dinya de estbîyayîşê xo ferq kerd. Demokratîkbîyayîşê Tirkîya çareserîya meseleya kurdan ra vîyareno ra. Ronayîşê Komare ra nata sîstemo ke nasnameyê kurdan înkar keno ame înşakerdene. Problemo bingeyîn o ke Tirkîya fîneno tengayî, înkarê estbîyayîşê kurdan o. Eke meseleya kurdan bêro çareserkerdene meseleyê komelkî yê bîyî Tirkîya zî eşkenê bêrê çareserkerdene.”
Umîte Konferansê “Seserra Dîyine de Bedilnayîşê Demokratîkî yê Komare” sey averşîyayîşê pozîtîfî erjna û vat munaqeşeyê sey bedilnayîşê demokraîtîkî yê Tirkîya gerek her hetê komelî ra bêrê vilakerdene.
Umîte bale ante eşkerayîyanê temsîlkaranê îqtîdarî yê derheqê Prosesê Haştîye û Komelê Demokratîkî ser û vat: “Rixmê eşkerayîyan gamêke nêameye eştene. Kam destê înan tepişeno, kam verê înan de beno asteng? Erdogan û Bahçelîyî derheqê muhîmîya prosesî eşkerayîyî dayî la pratîk de gamê pêtî nêameyî eştene. Çîyo ke kewno milê ma, ma kerd. Heme barê prosesî milê Rayber Apoyî de yo. Ma hêzê çareserî û îradeyê sîyasîyî yê Rayber Apoyî ra bawer kenê. Vanê proses dewam keno la çîyêk nîno kerdene. Proses bertengê entegrasyonê demokratîkî de paweno. Eke senî ke vanê proses yeno lezkerdene gerek statuyê sîyasî û huqûqî yê Rayber Apoyî bêro naskerdene, azadîya ci ya fîzîkî bêro caardene ke bieşko xebate rayra bêro.”
