Wekîlê Bîngolî yê DEM Parti Omer Faruk Hulaku, birnayîşê daran ê herêma Cafranî ard rojevê Meclîsî û persa vat ke, “Çira birnayîşê daran nêno kontrolkerdene? Çira kam xizar gêno destê xo verê xo dano daristanî û daran birneno?”
Omer Faruk Hulaku, Meclîs de qiseykerdişê xo de problemê Dewa (Dallitepe) Cafranî û dewanê herêma Tawizî ardî ziwan û wina va: “Hem dewijê Cafranî hem zî dewijê bînî nêwazenê ke daristanê înan bêrê birnayene. Mudirîya Karanê Daristanî vano no birnayîş seba ‘gencîye û weşbîyayîşê’ daran o. Labelê orte de qet gencîye û weşbîyayîş çin o; kam xizar gêno destê xo verê xo dano daristanî û daran birneno.
Ez bi eşkereyî persena, birnayîşê daran ê Cafranî bi planî dayo kamcîn kesan? Eke Mudirîya Karanê Daristanî raşt vano ke no kar seba gencîye yo, çira nêşino kontrol nêkeno? Nika dewaya huqûqî dewam kena la qetlê daran zî dewam keno. Ganî her hetî ra cipersayîşêk bêro kerdene. Seba na ye zî ganî ca de kifş bêro kerdene. Wa lez û bez tescîlê birnayîşî û tescîlê îhaleyan bêrê cipersayene. Çiyo ke şarê Bîngolî nêwazeno, şima nêeşkenê vera şarî de bivirazê. Aye ra no birnayîşo ke pê ewraqanê sexteyan yeno viraştene bêro vindarnayene. Makîneyan û xizaranê xo bigê mîyanê daristanî ra vejîyê. Bi hurmet nêzdîyê îradeyê muxtarîye û şarê Cafranî bibê. Şarî bi cendirme, tehdît û tehqiqatan şarê Cafranî metersnê. Cafran bêwayîr nîyo, ma tîya de yê.”
Dewa Eskarî ya herêma Tawizî terkê qederê xo bîya!
Omer Faruk Hulaku qiseykerdişê xo de problemê herêma Tawizî ser o zî vindert û wina va:
“Herêma Tawizî de dewa Eskarî de 90 banî û 7 mezreyî sey xo halî de ame veradeyene û dinya ra ameyê birnayene. 6 mezrayanê Eskarî de awe çin a, 2 camî û mektebêk zî bi fermî xizmet nêdanê. Rayê dewan zî rind nîyê; her tim seba heyelan û çixî padîyenê û qet nêbenê a. Şarê dewe ame ma het û vanê ke ma rê muxatabêk çin o. Seba çareserîye nê problemî şîyê qeymaqamîye, mudirîye, îdareyo taybet û hetê mebusan zî, labelê qet netîceyêk nêgêrayê.”
Omer Faruk Hulaku qiseykerdişê xo wina qedêna:
“Îdareyo taybet telefonanê înan anêkeno. Serekê Meclîsê Şaristanî vano ke tena yew makîneya ma est a. Bîngol de 325 dewî est ê û tena yew makîne est a! No tabloyê şermî ma verdayê teqdîrê şarê Tawizî. Ganî derhal problemê raye, awe, elektrîk, camî û mekteban ê dewa Eskarî û herêma Tawizî bêrê çareserkerdene û butçe ra nê projeyî bêrê amadekerdene.”
