Endamê Komîteya Koçberan a Serêkanîyê avûkat Ciwan Îsayî dîyar kerd ke koçberê Serêkanîyê hema zî nêeşkenî agêrî herêma xo û dîyar kerd ke Serêkanîyê hema zî bi destê dewleta tirkan yena rayraberdene û têkilîya ci şaristanê Hesekê ra ameya birnayîş. Avûkat Ciwan Îsayî wina vat: “Şarê ma yo koçber paweyê agêrayîşê herra xo yo labelê ê waştişê agêrayîşêko goreyê pîvananê heqanê merdiman kenî.”
Mîyanê Rayberîya Xosere û Hukmatê Demkî yê Şamî de hêrişan ra pey, roja 29ê çele de peymanêk ameybî îmzakerdene. Nuqtayanê tewr pîl û muhîm ê na peymane rewşa koçberanê Efrîn û Serêkanîyê bîye. Goreyê peymane, ganî Tirkîya Efrîn û Serêkanîyê ra xo apey bianca û koçber agêrê herêm û waranê xo. Heta nika tena 8 grûbê koçberan agêrayî Efrîn labelê seba Serêkanîyê hema tu agêrayîşêk nêbîyo. Na babete ser o, Endamê Komîteya Koçberan a Serêkanîyê avûkat Ciwan Îsayî ajansê ma rê qisey kerd.
‘Sucê şerî ame kerdene’
Avûkat Ciwan Îsayî ard vîr ke dimayê peymana 29ê çeleyî, nuqtaya sereke meseleya agêrayîşê koçberan bîye û wina vat: “Dimayê hêrişê vera Serêkanîyê yê serra 2019î, nêzdîyê se ra 87ê şarê ma koçber bi û mîyanê qampanê dewan û tayê cayanê herêma Cizîrî de mendî. Nê hêrişan reyde zafêrî binpaykerdişê heqanê merdiman û sucê gîrdî ameyî keredene. Li gorî qanûnên mîyanbajarî (uluslararası), nê gûreyî sûcê şerî bî. Bajarê Serêkanîyê û gundê ci heta ewro têkîlîya ci pêro parêzgeha Hesekê ra ameya qutkerdene. Zaf kesî warê xo ra qut bîyî û rûbêrûyê binpêkerdena mafên mirovan bîyî. Serê naye ra şarê ma waştîşê ageyrayîşêkê li gorî pîvanên mafên mirovan keno.”
Seba agêrayîşê koçberan muracat û kombîyayîşî
Ciwan Îsayî da zanayene ke seba agêrayîşê Heyetê Hukmatê Demkî yê Şamî reyde kombîyayîşan vîrazenî û muracatê înan rind rayra şonê. Ciwan Îsayî vat ke nê xebatî seba viraştişê mekanîzmaya agêrayîşê koçberan ewle yê û wina vat: “Rayîrî akerde bîyî labelê derûdorê ci de hema zaf rîskanê rewşa ewleyî û domdaran est ê. Sewbîna kesê ke agêrayî zî est ê, goreyê kombîyayîşanê peyênan, heyetê Şamî bi xo zî vano qerar ameyo girewtene ke kesê ke dimayê 2019î Serêkanîyê de ameyê bicakerdene ganî tîya ra bîvejîyê û koçberî agêrê cayanê xo. Ganî no proses derg nêbo çunke rewşa qampan de cuye zaf xirab a.”
‘Goreyê waştiş û qebulkerdişê dewleta tirkan têgêrenê’
Ciwan Îsayî dîyar kerd ke qerarê Hukmatê Demkî yê Şamî xoser nîyo, sîyasetê înan goreyê menfaatanê dewleta tirkan yeno rayraberdene û wina domna: “Sîyasetê Şamî goreyê Dewleta tirkan yeno rayraberdene. Naye ser o qeraro sîyasî tena bi serê xo nêyeno dayene. Ganî Şam problememanê teberî ra vete problemanê zereyê Sûrîye çareser bikero. Meseleya sereke koçberî ya. Labelê ma vînenî ke Şam goreyê qebulkerdişê dewleta tirkan gaman erzeno. Ma her tim pêvînayîşanê xo de vanê ke ganî Sûrîyeyêka demokratîk bêra awankerdene ke dewletê derûdorê xo tira anto. Sey nimûne Serêkanîyê heta ewro hem herra Sûrîye ra hem zî şaristanê Hesekê ra ameyo qutkerdene. Serêkanîyê de hema zî pere û mektebê dewleta tirkan est ê.”
‘Rewşa koçberan baş nîya’
Ciwan Îsayî vat ke hem hetê aborî hem zî hetê cuye ra rewşa koçberan zaf xirab a û wina dewam kerd: “Neteweyê Yewbîyayeyî (NY) heta ewro bêveng mendî û tu hetkarîya xurt zereyê qampan de nêkerd. Koçberî nika 8 serrî yo mîyanê çadiran de ciwîyenî. Nê çadirî însanan ne varanî ra ne zî germê pîlî ra pawenî. Nêweşîyê weşîye zî zaf ê. Ma pawenî ke dimayê bedilîyayîanê Sûrîye rewşe rind biba labelê çi heyf ke hema sey verê dewam kena.”
‘Hema zî Serêkanîyê rê tu agêrayîşêk nêbîyo’
Peynîya qiseykerdişê xo de Ciwan Îsayî da zanayene ke Komîteya Koçberan a Serêkanîyê hîna zaf warê huqûq û dîplomasî de xebatêk rayra berna û wina vat: “Ma sey komîte destpêkî ra belgekerdişê binpaykerdişan kerd û ma mektubê fermî dewletanê sey Rusya, DYA û Ewropa rê erşawitê. Labelê her tim bêvengîyêka pîle ameya meydan. Her kes vano şima rast ê, hêriş ameyo kerdene, labelê şima rolê Tirkîya zî vînenî. Heta ewro tu agêrayîşêk seba Serêkanîyê nêbîyo, tena muracaatî est ê. Xebatê ma huqûqî û dîplomatîkî do dewam bîkerî heta ke şarê ma agêro herra xo ser.”
