Parlamentera Swîsre Rielle dîyar kerd ke nîyadayîşê îqtîdarî yê prosesî endîşedar o û vat: “Seba ke Ocalan rolê xo kay bikero, hewceyîya statuyê qanûnî est a. Îrade kêmî yo. Erdogan ganî dîyalogê bi Ocalanî qebul bikero.”
Parlamentera Federale ya Swîsre Laurence Fehlmann Rielle, ANF’yî rê derheqê prosesê haştîye yê badê vengdayîşê Rayber Apoyî yê 27ê sibate 2025î de qisey kerd.
Rielle vat ke dîyalogê bi Ocalanî firsendêko bihêvî bîyî, la badê ke wext vîyart, averşîyayîşêko erjîyaye nêaseno. Vat seba ke PKKyî çekî verdayî, hetê tirkan cewabêko raştikên nêda û proses vera-vera xetimîya. Vat ke krîzê mîyanneteweyî, şerê Îranî, meseleya Ukraynayî, bî sebeb ke meselaya kurdan reyna peyê planan de bimano, coka muhîm o ke îradeyê kurdan ê haştîye, talebê otonomî û naskerdişê nasnameyî bêrê qiseykerdene.
Rielle bale ante persa ‘Erdogan wazeno wext qezenc biko?’ ser o û vist virî ke vera DEM Partî û CHP’yî tedayî dewam kenê; nimûneyê tepiştişê Ekrem Îmamoglûyî da. Vat ke nê tatbîqatê zordayîşî eksê cehdanê haştîye xebitîyenê.
Rielle nimûneyê Nelson Mandela ard vîrî ke 27 serrî hepis de mend û peynî de bî mîmaranê qedîyayîşê rejîmê apartheidî ra yew. Vat eke Erdogan raştî aştî wazeno, ganî nê destê dergkerdeyî qebul biko û tecrîdê Ocalanî biqedîyo. Peynî de vat ke komelê mîyanneteweyî zî berpirsîyar a û ganî zor bido Tirkîya ke goreyê dewleta huqûqî xo têw bido.
