Hemsereka DBP’yî Amedî Sultan Yaray derheqê “Mîtîngê Azadîye” yê do 8ê sibate de Amed de Meydanê Îstasyonî de pê bêro, venga cinîyan da û vat: “Bêrê ma pîya peynîya şerî bîyarê. Ma pîya bi veng û bi tililîyanê xo vajê; ‘jin jiyan azadî’.”
Partîya Têduştî û Demokrasî (DEM Partî) û Partîya Herêmanê Demokratîke (DBP) bi rojano semedê “Mîtîngê Azadîye” ke do Meydanê Îstasyonî yê Yenîşehîrî yê Amedî bêro kerdiş, xebatanê xo kenê. Hemsereka DBP’yî ya Amedî Sultan Yaray derheqê mîtîngo ke do 8ê sibate bi şîarê “Semedê aştîye azadî” saete 12.00ine de pê bêro, veng da.
Sultan Yaray vernîya ke vengdayîş bikero, girîngîyê mîtîngî ê semedê cinîyan ard ziwan û wina vat: “Cinî semedê azadbîyayîşê cinî û komelî têkoşîn kenê. Semedê nê ganî cinî wayîrê nê mîtîngî vejîyê û her kesî ra zêdeyêr wayîrê aştî û azadîye vejîyê. Seke yeno zanayîş pêvînayîşê ke Birêz Ocalanî de ameyo kerdiş, semedê cinîyan silam amebî şirawitiş. Ma do zî a roje meydanê cewabê mesajî bidê. Ma do silamanê xo bişirawê Îmraliyî û vajê ke ‘heta ti azad nêbê, komel azad nêbeno’. Senîn ke ey vat, ‘heta cinî azad nêbê, komel azad nêbena’, cinî zî vanê, ‘azadîya ma bi azadîya Birêz Ocalanî mumkin a’. Ganî no tecrîd wurzo ke ma pîya aştî û azadî bîyarê.”
Ma bi felsefeya ‘jin jiyan azadî’ aştîye bîyarê
Sultan Yaray tewr peyîn qiseykerdişê xo de dîyar kerd ke ganî bi taybetî cinî mîtîng de cayê xo bigîrê û wina vat: “Ma venga cinîyan kenê. Senîn ke felsefeya ‘jin jiyan azadî’ dinya de vila bîya û bîya felsefeya heme cinîyan, bêrê ma pîya peynîya nê şerî bîyarê. Ma pîya bi veng û bi tililîyanê xo vajê, ‘jin jiyan azadî’. Nê semedî ra 8ê sibate muhîm o. Nika prosesêk est o la nameyê prosesî hema çin o. Pêvînayîşê Birêz Ocalanî dir komelî de kelecanêk pîl awan kerd. Ganî nameyêk nê prosesî rê bêro dayîş. Nê semedî ra venga pêro cinîyan dana û vana ke bi cil û belgê xo yê adetî bêrê meydan û aştî û azadîye pê bîyarê.”
