Ame musayene ke Sefer Baran ke veradayîşê ey 6 rey taloq bîyo, tira persê “Ti Abdullah Ocalanî senî vînenî?” ameyo perskerdene. Îbrahîm Baranî ke vist virî ke rîyê taloqkerdişanê ra 2 serrî yo birayê ey hepisxane de yo, vat: “No tetbîqato bêhuqûqî ganî biqedîyo.”
Goreyê daneyanê Mudurîya Pêroyî ya Ceza û Tewqîfkerdişan û rêxistinanê huqûqî, 2021î ra nat bi qerarê Heyetanê Îdare û Çimdarî (ÎGK) veradayîşê 8 hezar û 500 girewteyan ameyo taloqkerdene. Veradayîşê girewteyan bi sebebanê “poşmanî nêdîyayîş” û “rind nêbîyayîşê rewşe” yeno taloqkerdene; îtîrazê avûkat û keyeyan ê vera nê taloqkerdişan yenê redkerdene. Goreyê xebera ANF’yî veradayîşê girewte Sefer Baranî ke 11 serrî yo hepisxane de yo, bi eynî sebeban 6 reyî ame taloqkerdene. Ame musayene ke Sefer Barano ke 35 serrî yo girewte yo, rojanê ameyoxan de reya 7. do bivejîyo vernîya heyetî, heyetî de persê “Ti Abdullah Ocalanî senî vînenî?” û “PKK rêxistinêka teror a?” ameyê kerdene.
Sefer Baran ke 2015î de Êlihî de badê destbendkerdişî ame girewtene, bi îdiaya “endamtîya rêxistine” 12 serrî cezaya hepsî girewt. Badê cezaya xo gelek hepisxaneyan de mend û tewr peynî seba Hepisxaneyo Girewte yê Tîpê L’yî yê Espîye yê Gîresun. Her çend qerarê veradayîşê bişert seba ey amebo dayene zî 2 serrî yo nêyeno veradayene. Ame musayene ke Sefer Baranî de nêweşîya astimo kronîk zî est a.
Îbrahîm Baranî, birayê Sefer Baranî yo pîl, bi vatişê “Hem zere de hem teber ra wazenê hêvî bişiknê” reaksîyon d. Îbrahîm Baranî veng da ke pêroyê girewteyê ke nê şertan de yê, bêrê veradayene.
Ame musayene ke Sefer Baran, ke avûkatê ci çin o, nê prosesî de reya bîne hepisxane de ameliyat bîyo û dermanan şuxulneno. Ame musayene ke her çend tu cezaya dîsîplînî çin ba zî, seba ke Sefer Baranî pêdîyayîşî de silam dayo girewteyanê koxuşê bînî, seba astengkerdişê selamdayîşê ey ser o tecrîd ameyo kerdene.
Îbrahîm Baranî vat ke îtîrazê înan bênetîce mendî û vat: “Tu çalakîya înan a sosyale çin a. Verê şîyêne spor, la nika ê zî nêkenê. Sewqê nêweşxane yan zaf taloq benê yan qet nêbenê. Ma êdî nêeşkenê bihûmarê ke veradayîşê ey çend reyî ameyo taloqkerdene. Bi no hewa hem hêvîya girewteyan hem ya keyeyan wazenê bişiknê. No tatbîqat ganî biqedîyo. Tena Sefer ney, pêroyê girewteyî ganî bêrê veradayene.”
