Mehmet Polat ke 30 serrî ra pey Hepisxaneyê Amedî ra ame veradayîş, hetê keye, heskerdoxanê xo, TUAY-DER’a Amedî û MED TUHAD-FED’î ra ame pêşwazîkerdene. Mehmet Polatî dîyar kerd ke girewteyê sîyasî wazenê vejîyê û hêz bidê prosesê çareserî.
Mehmet Polat ko dimayê 30 serran Hepisxsaneyê Ewleyîya Berze yê Hûmara 1. yê Amedî ra ame veradayîş, hetê keye, nasanê xo, endamanê TUAY-DER’a Amedî û MED TUHAD-FED’î ra bi tilîlî, çepikan û bi sloganê “Bijî berxwedana zindanan” ame pêşwazîkerdene. Mehmet Polatî kesê ke o pêşwazî kerdî yew bi yew verar kerdî û dima zî boranî fîrnayê. Mehmet Polatî vernîya berê hepisxaneyî de qiseykerdîşêko kilm kerd û wina vat:
“Her çend tîya ra vejiyayîş cayê şahî û keyfweşîye bo zî, ma zaf embazê xo peyê xo de veradayî. Embazî nê prosesê ewroyînî ra bihîvî yê. Wazenê vejîyê û hêz bidê prosesî. Nê prosesî de barêko giran keweno serê milanê ma pêrûnan. Embazanê pêrûnan zaf silamî erşawitê. Hêvîya ma a ya ke ma pîya şarê xo reyde rojanê weş û rindan pare bikerê.”
Qiseykerdîşê Mehmet Polatî re pey, girseyî çepikî cenayê, tilîlî kerdî û sloganê “Bijî berxwedana zindanan” vat.
Mehmet Polat hezîrana 1996î de Bedlîs de amebi destbendkerdene. Dima ke 38 rojî destbendkerde ey rê îşkence ame kerdene, o seba Mehkemaya Ewleyîya Dewlete (DGM) ya Hûmara 3. ya Amedî ame sewqkerdene. Mehkema bi sucanê cîya-cîyan cezaya muebedî daye ci û ey erşawit hepisxane. Mehmet Polat bi rêze hepisxaneyanê Dîlok, Kirikkale, Şirnex, Tîpê D’yî yê Amedî û Hepisxaneyê Ewleyîya Berze ya Hûmara 1. yê Amedî de ame girewtene.
