Xelatgirewtoxa Aştî ya Nobelî Jody Williams Rayberê Şarê Kurdî Abdullah Ocalanî mektubê piştîdayîşî erşawit. Jody Wîllîams îfade kerd ke fikrê Rayberê Şarê Kurdî Abdullah Ocalanî yê derheqê demokrasî, têhetbîyayîş, azadîya cinî û çareserîyanê aştîyaneyan de hêvî daya xeylê însanan.
Wayîrê Xelata Aştî ya Nobelî û aktîvîsta heqanê merdiman Jody Wîllîams, mektubî de ke Rayberê Şarê Kurdî Abdullah Ocalanî rê erşawit , vist virî ke a piştî dana rolê ey ê prosesê aştî û veng da ke verê her çî “heqê hêvî” heqê ey ê bingeyinî bêrê naskerdene.
Jody Wîllîams ke piştîdayoxa demderg a kampanyaya mîyanneteweyî ya “Azadî seba Abdullah Ocalanî, Çareserîya Sîyasî seba Meseleya Kurdî” ra yew a, mektubê xo de vist virî ke girewtişê Rayberê Şarê Kurdî Abdullah Ocalanî yê serranê dergan problemê giran ê heqanê merdiman û huqûqî virazenê.
Jody Williams vat ke serrî ke Rayberê Şarê Kurdî Abdullah Ocalanî hepisxane de vîyarnayî, nêeşkenê tena bi demê girewtişî bêrê erjnayene; vat ke na rewşe derheqê edalet, şerefê însanî û heqanê ke goreyê huqûqê mîyanneteweyî de persanê hîna xorînan ana meydan.
Jody Williams vat ke cezaya hepsê demdergî her însanî ser o barêko giran bar keno, la Rayberê Şarê Kurdî Abdullah Ocalan nê serran de dîrayet û qerardarîya xo pawite. Aye vist virî ke Mehkemaya Heqanê Merdiman a Ewropa (MHME) eşkera kerd ke kesê ke cezaya hepsê ebedî yan demdergî girewta zî wayîrê “heqê hêvî” yê, yanî îhtîmalêko raştikên ê veradayîşî û erjnayîşêko manîdar ê cezaya xo est o. Vat ke edalet ganî însanî bimano û hepisxane ganî îhtîmalê ke însan rojêk agêro komelî mîyan bi temamî nêqedêna.
Jody Williams vat ke tecrube, perspektîf û serkêşîya Rayberê Şarê Kurdî Abdullah Ocalanî averberdişê vurîyayîşê komelkî de rolêko muhîm kay keno, û dewranê pêkewtiş û parçebîyayîşî de dîyalogî esas gêno; veng da ke şertê hewceyî yê ke Rayberê Şarê Kurdî Abdullah Ocalan bieşko prosesanê aştî yê nika û ameyoxî rê bi hewayêko eşkera û tesîrdar kede bido, bêrê afirnayene.
