Kiştişê rojnameger Azîz Koyluoglu ser o Partîya Herêmanê Demokratîke (DBP) beyanato nuşteyî da û beyanat de ame vatêne ke qetilkerdişê rojnameger Azîz Koyluoglu, nîşanê şerê taybetî yo ke vera şarê kurdî yeno caardene yo. No suîkasto sîstematîk leteyê sîyasetê îmha yo.
Rojnameger Azîz Koyluoglu 27ê Çeleyî de Rinya de bi hêrişê Tirkîya ame kiştiş. Kiştişê Rojnameger Azîz Koyluogluyî ser o Partîya Herêmanê Demokratîke (DBP) beyanato nuşteyî da.
Beyanatê DBP’î wina yo: “Qetilkerdişê rojnameger Azîz Koyluoglu, nîşanê şerê taybetî yo ke vera şarê kurdî yeno caardene yo. No suîkasto sîstematîk leteyê sîyasetê îmha yo.
Kedkarê çapemenîya azade vera nê polîtîkayanê texelnayîş û çimterskerdişî rojêke zî game apey nêeşte. Ê do naye ra tepîya raştîye bi hawayêko hîna hêzdar biqîrê. Hişmendîya qilêrina ke wazena serê raştîye binimo, do qetî nêreso armancê xo. Sere de Azîz Koyluoglu qetlîyamê pêro kedkaranê çapemenîya azade, sucê ke vera merdimîye û huqûqê mîyanneteweyî virazîyenê yê. Ma qetlîyamê rojnamegeran şermezar kenê, vera nê qetlîyaman heme rayapêroyîya herêmî û mîyanneteweyî seba vengê xo berzkerdişî rê silahîye kenê.
Mekanîzmaya şerê taybetî ya ke bi qetilkerdişê rojnamegeran birastî vera destkewteyanê şarê kurdî û raştîye şer akena, bi nê hêrişanê duştê merdimîye do nêreso armancê xo. Ne vengê raştîye kêm bibo, ne çapemenîya azade bêveng bimano, ne zî şaro kurd şîarê xo yê azadîye ra fek vera bido.”
